قر دەنساۋلىق ساقتاۋ ءمينيسترى الەكسەي تسوي قازاقستاندىقتارعا ەسكەرتۋ جاسادى. بۇل تۋرالى مينيستر الەۋمەتتىك جەلىدەگى پاراقشاسىندا حابارلادى.
«دەنساۋلىعىنىڭ ناشارلاۋىنا قاتىستى كىشكەنە شاعىمدار بولعان كەزدە، ورازانى توقتاتىپ، مەديتسينالىق كومەككە جۇگىنگەن ءجون. دەنەنى قاتتى سۋسىزدانۋعا ۇشىراتپاۋ جانە تەڭگەرىمدى ديەتانى ۇستانۋعا تىرىسۋ ماڭىزدى»، – دەدى ول.
تسوي ۆاكتسيناتسيانىڭ ورازانى بۇزبايتىنىن ايتتى.
«ەكىنشى جىل قاتارىنان بۇكىل الەمدەگى مۇسىلماندار قاسيەتتى ايدى پاندەميا جاعدايىندا وتكىزەدى. بىرلەسكەن جۇما نامازدارى الىنىپ تاستالدى، اۋىزاشار وتكىزۋگە شەكتەۋ قويىلدى. وسى سىناقتاردان تۇسىنىستىكپەن جانە شىدامدىلىقپەن وتەتىنىمىزگە جانە تۋىستارىمىز بەن جاقىندارىمىزدىڭ دەنساۋلىعىن ساقتاۋ ءۇشىن بارلىق قاجەتتى ەرەجەلەردى ۇستاناتىنىمىزعا سەنىمدىمىن»، – دەيدى مينيستر.
