25 جاستاعى اكىمحان ماجەنوۆ ۋفادا وتكەن "ياڭى موڭ" حالىقارالىق مۋزىكالىق تەلەۆيزيالىق بايقاۋىندا قازاقستاننىڭ نامىسىن قورعايدى، دەپ حابارلايدى "ادىرنا" ۇلتتىق پورتالى.
قازاقستاندىق جىگىت 16 جاسىنان باستاپ ساحنادا ءان ايتادى. ول حالىقارالىق جانە رەسپۋبليكالىق بايقاۋلاردىڭ لاۋرەاتى. قازىرگى تاڭدا قازاق ۇلتتىق ونەر ۋنيۆەرسيتەتىنىڭ 4-كۋرسىندا وقيدى. اكىمحان - نۇر-سۇلتانداعى مەملەكەتتىك اكادەميالىق فيلارمونيانىڭ ءسوليسى.
بايقاۋدىڭ ەكىنشى اينالىمىندا ول قازىلار القاسى قۇرامىندا بولعان ۆالەري مەلادزەنىڭ «اكتريسا» ءانىن ورىندادى.
"ماعان ءاردايىم قاتتى داۋىسپەن ءان ايتۋ وڭاي دەپ ايتاتىن. ال اقىرىن ءان ايتۋ وتە قيىن. ءسىز ەشقاشان ايقايعا، شەكتەن تىس شىرقاۋعا اۋىسقان ەمەسسىز. ءار شىرقاعان داۋىسىڭىزدا سونشاما كۇش بار. بىردە-ءبىر لاقتىرىلعان، قاتە ءارى كەزدەيسوق ايتىلعان نوتالار بولعان جوق. ءسىزدىڭ باسىڭىزدا كومپيۋتەر بار ما، جوق پا؟ بىراق ءار نوتا وتە نازىك وڭدەلدى. بۇل تاڭقالارلىق", دەدى مەلادزە قازاقستاندىقتىڭ ورىنداۋىنا.
سونداي-اق، قازىلار القاسىنىڭ قۇرامىنا تاتار-باشقۇرت ەسترادا ءارتىسى ەلۆين گرەي، پروديۋسەر لينا اريفۋلينا، ءانشى گۇلناز اساەۆا جانە باشقۇرتستاننىڭ حالىق ءارتىسى ازات زيگانشين بولدى.
"ادىرنا" ۇلتتىق پورتالى
