الماتىلىق التىناي ۇسەنوۆا ەكى ايدان بەرى ارزان قوناق ءۇيدى پانالاۋعا ءماجبۇر. شەتەلدە وقىعان قارجىگەر ءبىر كەزدەرى وتە تابىستى ادام بولعان. شيرەك عاسىرعا جۋىق ۋاقىت حالىقارالىق كومپانيالاردا قىزمەت ەتكەن. ۇسەنوۆا مۇنداي ءمۇساپىر كۇيگە تۇسۋىنە جاقىن تانىسىن كىنالاپ وتىر. 8 جىلدان بەرى جاقىن ارالاسقان ادامى ءبىر-اق ساتتە ءوزىن تاقىرعا وتىرعىزىپ كەتكەن، دەپ حابارلايدى ادىرنا ۇلتتىق پورتالى «زاڭ سويلەسىن» باعدارلاماسىنا سىلتەمە جاساپ.
«ەكى پاتەرىمنەن، ۇلكەن ۇيىمنەن ايىرىلىپ، دالادا قالدىم. سىدىقوۆ ولجاس سەرىكۇلى دەگەن ادام مەنى الداپ، سەنىمىمە كىرىپ، 257 ميلليون تەڭگە اقشامدى الىپ كەتتى. 25 جىل ىستەگەن ەڭبەگىم قۇمعا سىڭگەندەي جوق بولدى. ەندى ءۇيسىز، كۇيسىز مىناداي جەردە تۇرۋعا ءماجبۇرمىن»، - دەيدى الماتى قالاسىنىڭ تۇرعىنى التىناي ۇسەنوۆا.
ولجاس التىنايدى اگروبيزنەسكە ينۆەستيتسيا سالۋعا كوندىرگەن. قىرعىزستاننان توننالاپ كارتوپ اكەلىپ، ونى ەلدەگى ءىرى ساۋدا ورىندارىنا وتكىزەتىنى تۋرالى كەلىسىم شارتتاردى كورسەتەدى. شاش ەتەكتەن پايداعا كەنەلەسىڭ، سالعان اقشاڭ ەسەلەپ قايتادى دەپ سەندىرگەن.
«5-10 مىڭ دوللار، ودان كەيىن 56 مىڭ دوللار، سوڭىندا 200 مىڭ دوللاردى قولىنا ساناپ بەردىم. ول ماعان 1 ميلليون دوللاردىڭ كەلىسىم شارتتارىن كورسەتتى. ءار كەلىسىم شارتتان 40% ۇلەسىڭدى الىپ وتىراسىڭ دەدى. الايدا 40% تۇگىلى سالعان ينۆەستيتسيامدى، اقشامدى الا الماي قالدىم. سويتسەم ايتقانىنىڭ ءبارى وتىرىك ەكەن. كەلىسىم شارتتا كورسەتىلگەن كومپانيالار تۇگەل جالعان بولىپ شىقتى»، - دەيدى ول.
التىنايدىڭ تانىسىنا كوزسىز سەنۋىنىڭ، ەش قورىقپاستان بيزنەسكە اقشا سالۋىنىڭ تاعى ءبىر سەبەبى بار. كەلىنشەك ولجاستىڭ اكەسى جوعارى قىزمەتتەگى لاۋازىم يەسى بولعانىنا قاراپ، ونداي ازاماتتىڭ ۇلى الداپ كەتپەس دەپ سەنگەن.
«ولجاس - بار جەردەن شىققان جىگىت. اكەسى ۇلكەن قىزمەتتە وتىر. ول ءوزىن ۇنەمى تابىستى ادام رەتىندە، مىقتى بيزنەسمەن كەيپىندە كورسەتەتىن. اقشا بەرەردە وسى جاعداياتتار ماعان قاتتى اسەر ەتتى. ەل ءۇشىن قىزمەت ەتىپ جۇرگەن تۇلعانىڭ بالاسى الدايدى دەپ ەش ويلامادىم»، - دەيدى الماتى قالاسىنىڭ تۇرعىنى التىناي ۇسەنوۆا.
قازىر التىنايدىڭ قولىندا اقشانىڭ ورنىنا ولجاسقا جىبەرگەن اقشالارىنىڭ تۇبىرتەگى عانا بار. 257 ميلليون تەڭگەنى قالتاعا باسقان تانىسى قارىزدى انە بەرەم، مىنە بەرەممەن ۋاقىتتى سوزعان. مىنا اۋديوحابارلاماسىندا دا جاس جىگىت اقشانى قايتارىپ بەرەتىنىن ايتىپ سەندىرەدى.
«مەن تىرلىكتى اياقسىز قالدىرعىم كەلمەيدى. ساعان ۋادە ەتكەندەي، ءبارىن دوللارمەن، دوللار باعامى قانداي بولسا دا دوللارمەن قايتارامىن. راقمەتىمدى دە ايتامىن. التىناي، ساراڭ ادام ەمەسىمدى بىلەسىڭ عوي؟ مەن ءبارىن قايتارامىن، سەن ونى جاقسى بىلەسىڭ»، - دەپ اۋديوحابارلاما جىبەرگەن ولجاس سىدىقوۆ.
بىراق ۋادە ەتىلگەن پايدا دا، اقشانىڭ ءوزى دە بولماعان سوڭ التىناي ۇسەنوۆا پوليتسياعا ارىزدانعان. قىلمىستىق ءىس قوزعاعان الماتى قالاسىنىڭ المالى اۋداندىق پوليتسيا باسقارماسىنىڭ تەرگەۋشىلەرى ولجاستىڭ اتىنا تىركەلگەن كومپانيالاردىڭ جالعان ەكەنىن انىقتاعان كورىنەدى.
«تەرگەۋ كەزىندە ونىڭ اتىنا تىركەلگەن 5 كومپانيانىڭ ءبىر-بىرىمەن جالعان كەلىسىم شارت جاساپ وتىرعانى انىقتالدى. شەت ەلدەرمەن بايلانىس تۇگىلى ءبىر تيىنعا ساۋدا جاساماعان. بىراق قۇجاتتاردى وتە ساۋاتتى راسىمدەگەن. قويىلعان مورلەر مەن كەلىسىم شارتتار ءبىر ادامنىڭ قولىنان شىققان»، - دەيدى التىناي.
ولجاس سىدىقوۆتىڭ ۇستىنەن اسا ءىرى كولەمدى اقشا جىمقىردى، الاياقتىق جاسادى دەگەن ايىپپەن قىلمىستىق ءىس قوزعالعان. كۇدىكتى ەكى ايدان بەرى تەرگەۋ اباقتىسىندا وتىر.
التىنايدىڭ ادۆوكاتى ونىڭ اقشانى سۋ جاڭا كولىككە، باسقا قىمبات مۇلىك الۋعا جۇمساعانى دالەلدەنسە دە، تەرگەۋ سىبدىر ءجۇرىپ جاتىر دەپ ەسەپتەيدى.
«تەرگەۋشىلەردىڭ باستى ماقساتى - قىلمىسكەردى ۇستاپ، تۇرمەگە وتىرعىزۋ عانا ەمەس، جابىرلەنۋشىگە كەلتىرگەن زيانىن ءوندىرىپ بەرۋ. كۇنى بۇگىنگە دەيىن ولجاستىڭ بانك ەسەپشوتى مەن اتىنداعى بار مۇلكىنە ەشقانداي بۇعات قويىلماعان. ونىڭ اقشانى الاياقتىق جولمەن العانىنا بارلىق دالەلدى بەرسەك تە، تەرگەۋ دۇرىس ءجۇرىپ جاتقان جوق. ءىس بۇرمالانىپ جاتىر دەپ سانايمىز»، - دەيدى ادۆوكات رەنات ناينباەۆ.
التىناي ۇسەنوۆا تەرگەۋدىڭ تۇرالاۋىنا ولجاستىڭ اكەسىنىڭ مانسابى سەبەپكەر مە دەپ كۇدىكتەنەدى. ايتپەسە، قولدارىنداعى بار ايعاقپەن تەرگەۋ ءىسىن ەكى ايدىڭ ىشىندە اياقتاۋعا بولار ەدى دەيدى. ال اباقتىدا وتىرعان كۇدىكتىنىڭ اكەسى، راسىمەن دە، استانادا جاۋاپتى قىزمەتتەگى لاۋازىم يەسى بولىپ شىقتى.
ولجاستىڭ اكەسى سەرىك سىدىقوۆ مىرزا ۇزاق جىل سەنات اپپاراتىندا باسشىلىق قىزمەتتە ىستەگەن. قازىر ورتالىق سايلاۋ كوميسسياسىنىڭ مۇشەسى. جابىرلەنۋشىنىڭ كۇدىگىنە بايلانىستى سەرىك مىرزامەن سويلەستىك. ول بالاسىنىڭ باسىنداعى جاعدايعا ارالاسپايتىنىن، ءبارىن قۇزىرلى ورىندار شەشەتىنىن ايتتى.
«ونى مەن قايدان بىلەيىن؟ مەن بالامنىڭ تەرگەۋدە جاتقانىن عانا بىلەمىن. بىراق ونىڭ دەتالدارىن بىلمەيمىن. قىلمىستىق ءىس تەرگەۋدە جاتىر. ول كامەلەت جاسىنا تولعان ازامات بولعاندىقتان، ءوز ىسىنە ءوزى جاۋاپ بەرەدى. ونىڭ دەتالدارىن بىلمەيمىن. ول كىسى ارىز بەرىپتى. مەنىڭ جۇمىس ورنىما جازعان، باسقا جەرلەرگە دە جازعان. ول تۋرالى نە ايتا الامىن؟ ەشتەڭە دەي المايمىن»، - دەيدى ولجاستىڭ اكەسى سەرىك سىدىقوۆ.
الماتى قالاسىنىڭ پوليتسيا دەپارتامەنتىنە حابارلاستىق. تەرگەۋدىڭ ءمان-جايىن سۇرادىق. دەپارتامەنت وكىلى قىلمىستىق ءىستىڭ ازىرگە تەرگەلىپ جاتقانىن، ناۋرىز ايىندا ءىستى سوتقا جولدايتىندارىن ايتىپ، جازباشا جاۋاپ بەردى.
الدانىپ بار اقشامنان ايىرىلدىم دەگەن التىناي ۇسەنوۆا ءالى دە ءبىراز ۋاقىت قوناق ۇيدە تۇراتىن سەكىلدى.
