Almatylyq Altynaı Úsenova eki aıdan beri arzan qonaq úıdi panalaýǵa májbúr. Shetelde oqyǵan qarjyger bir kezderi óte tabysty adam bolǵan. Shırek ǵasyrǵa jýyq ýaqyt halyqaralyq kompanııalarda qyzmet etken. Úsenova mundaı músápir kúıge túsýine jaqyn tanysyn kinálap otyr. 8 jyldan beri jaqyn aralasqan adamy bir-aq sátte ózin taqyrǵa otyrǵyzyp ketken, dep habarlaıdy Adyrna ulttyq portaly «Zań sóılesin» baǵdarlamasyna silteme jasap.
«Eki páterimnen, úlken úıimnen aıyrylyp, dalada qaldym. Sydyqov Oljas Serikuly degen adam meni aldap, senimime kirip, 257 mıllıon teńge aqshamdy alyp ketti. 25 jyl istegen eńbegim qumǵa sińgendeı joq boldy. Endi úısiz, kúısiz mynadaı jerde turýǵa májbúrmin», - deıdi Almaty qalasynyń turǵyny Altynaı Úsenova.
Oljas Altynaıdy agrobızneske ınvestıııa salýǵa kóndirgen. Qyrǵyzstannan tonnalap kartop ákelip, ony eldegi iri saýda oryndaryna ótkizetini týraly kelisim sharttardy kórsetedi. Shash etekten paıdaǵa kenelesiń, salǵan aqshań eselep qaıtady dep sendirgen.
«5-10 myń dollar, odan keıin 56 myń dollar, sońynda 200 myń dollardy qolyna sanap berdim. Ol maǵan 1 mıllıon dollardyń kelisim sharttaryn kórsetti. Ár kelisim sharttan 40% úlesińdi alyp otyrasyń dedi. Alaıda 40% túgili salǵan ınvestıııamdy, aqshamdy ala almaı qaldym. Sóıtsem aıtqanynyń bári ótirik eken. Kelisim shartta kórsetilgen kompanııalar túgel jalǵan bolyp shyqty», - deıdi ol.
Altynaıdyń tanysyna kózsiz senýiniń, esh qoryqpastan bızneske aqsha salýynyń taǵy bir sebebi bar. Kelinshek Oljastyń ákesi joǵary qyzmettegi laýazym ıesi bolǵanyna qarap, ondaı azamattyń uly aldap ketpes dep sengen.
«Oljas - bar jerden shyqqan jigit. Ákesi úlken qyzmette otyr. Ol ózin únemi tabysty adam retinde, myqty bıznesmen keıpinde kórsetetin. Aqsha bererde osy jaǵdaıattar maǵan qatty áser etti. El úshin qyzmet etip júrgen tulǵanyń balasy aldaıdy dep esh oılamadym», - deıdi Almaty qalasynyń turǵyny Altynaı Úsenova.
Qazir Altynaıdyń qolynda aqshanyń ornyna Oljasqa jibergen aqshalarynyń túbirtegi ǵana bar. 257 mıllıon teńgeni qaltaǵa basqan tanysy qaryzdy áne berem, mine beremmen ýaqytty sozǵan. Myna aýdıohabarlamasynda da jas jigit aqshany qaıtaryp beretinin aıtyp sendiredi.
«Men tirlikti aıaqsyz qaldyrǵym kelmeıdi. Saǵan ýáde etkendeı, bárin dollarmen, dollar baǵamy qandaı bolsa da dollarmen qaıtaramyn. Raqmetimdi de aıtamyn. Altynaı, sarań adam emesimdi bilesiń ǵoı? Men bárin qaıtaramyn, sen ony jaqsy bilesiń», - dep aýdıohabarlama jibergen Oljas Sydyqov.
Biraq ýáde etilgen paıda da, aqshanyń ózi de bolmaǵan soń Altynaı Úsenova polıııaǵa aryzdanǵan. Qylmystyq is qozǵaǵan Almaty qalasynyń Almaly aýdandyq polıııa basqarmasynyń tergeýshileri Oljastyń atyna tirkelgen kompanııalardyń jalǵan ekenin anyqtaǵan kórinedi.
«Tergeý kezinde onyń atyna tirkelgen 5 kompanııanyń bir-birimen jalǵan kelisim shart jasap otyrǵany anyqtaldy. Shet eldermen baılanys túgili bir tıynǵa saýda jasamaǵan. Biraq qujattardy óte saýatty rásimdegen. Qoıylǵan mórler men kelisim sharttar bir adamnyń qolynan shyqqan», - deıdi Altynaı.
Oljas Sydyqovtyń ústinen asa iri kólemdi aqsha jymqyrdy, alaıaqtyq jasady degen aıyppen qylmystyq is qozǵalǵan. Kúdikti eki aıdan beri tergeý abaqtysynda otyr.
Altynaıdyń advokaty onyń aqshany sý jańa kólikke, basqa qymbat múlik alýǵa jumsaǵany dáleldense de, tergeý sybdyr júrip jatyr dep esepteıdi.
«Tergeýshilerdiń basty maqsaty - qylmyskerdi ustap, túrmege otyrǵyzý ǵana emes, jábirlenýshige keltirgen zııanyn óndirip berý. Kúni búginge deıin Oljastyń bank esepshoty men atyndaǵy bar múlkine eshqandaı buǵat qoıylmaǵan. Onyń aqshany alaıaqtyq jolmen alǵanyna barlyq dáleldi bersek te, tergeý durys júrip jatqan joq. Is burmalanyp jatyr dep sanaımyz», - deıdi advokat Renat Naınbaev.
Altynaı Úsenova tergeýdiń turalaýyna Oljastyń ákesiniń mansaby sebepker me dep kúdiktenedi. Áıtpese, qoldaryndaǵy bar aıǵaqpen tergeý isin eki aıdyń ishinde aıaqtaýǵa bolar edi deıdi. Al abaqtyda otyrǵan kúdiktiniń ákesi, rasymen de, astanada jaýapty qyzmettegi laýazym ıesi bolyp shyqty.
Oljastyń ákesi Serik Sydyqov myrza uzaq jyl senat apparatynda basshylyq qyzmette istegen. Qazir ortalyq saılaý komıssııasynyń múshesi. Jábirlenýshiniń kúdigine baılanysty Serik myrzamen sóılestik. Ol balasynyń basyndaǵy jaǵdaıǵa aralaspaıtynyn, bárin quzyrly oryndar sheshetinin aıtty.
«Ony men qaıdan bileıin? Men balamnyń tergeýde jatqanyn ǵana bilemin. Biraq onyń detaldaryn bilmeımin. Qylmystyq is tergeýde jatyr. Ol kámelet jasyna tolǵan azamat bolǵandyqtan, óz isine ózi jaýap beredi. Onyń detaldaryn bilmeımin. Ol kisi aryz beripti. Meniń jumys ornyma jazǵan, basqa jerlerge de jazǵan. Ol týraly ne aıta alamyn? Eshteńe deı almaımyn», - deıdi Oljastyń ákesi Serik Sydyqov.
Almaty qalasynyń polıııa departamentine habarlastyq. Tergeýdiń mán-jaıyn suradyq. Departament ókili qylmystyq istiń ázirge tergelip jatqanyn, naýryz aıynda isti sotqa joldaıtyndaryn aıtyp, jazbasha jaýap berdi.
Aldanyp bar aqshamnan aıyryldym degen Altynaı Úsenova áli de biraz ýaqyt qonaq úıde turatyn sekildi.
