بىشكەكتە ىشكى ىستەر مينيسترلىگى عيماراتىنىڭ جانىندا «زورلىق-زومبىلىققا قارسى» ميتينگى ءوتىپ جاتىر، دەپ حابارلايدى "ادىرنا" ۇلتتىق پورتالى دەرەككوزگە سىلتەپ.
قىرعىزستاندىقتار 5 ساۋىردە ۇرلانعان 27 جاستاعى ايزادا قاناتبەكوۆانىڭ ولىمىنە بايلانىستى نارازىلىق ميتينگىنە شىقتى. ميتينگكە قاتىسۋشىلار مينيسترلىك باسشىسى ۇلان نيازبەكوۆ پەن بىشكەك پوليتسيا باسقارماسىنىڭ باستىعى باقىت ماتمۋساەۆتىڭ وتستاۆكاعا كەتۋىن تالاپ ەتۋدە.
نارازىلىق بىلدىرۋشىلەرگە قىرعىزستان رەسپۋبليكاسى ىشكى ىستەر مينيسترلىگى تەرگەۋ قىزمەتى قىزمەتكەرلەرىنىڭ ءبىرى شىقتى. ميتينگكە شىققاندار ونى تىڭداماي، ءمينيستردىڭ كەتۋىن تالاپ ەتتى.
ميتينگكە 200-دەن استام ادام جينالدى. بىشكەكتەگى نارازىلىق بىلدىرۋشىلەر پرەمەر-مينيسترگە «ۇيات» دەپ ايقايلاۋدا. «زورلىق-زومبىلىققا قارسى» ميتينگىگە قاتىسۋشىلارعا قىرعىزستان ۇكىمەتىنىڭ باسشىسى ۋلۋكبەك ماريپوۆ شىقتى. پرەمەر-مينيستر پرەزيدەنت سادىر جاپاروۆ ىشكى ىستەر مينيسترلىگى باسشىسىنىڭ وتستاۆكاسىن قاراستىرىپ جاتقانىن ايتتى.
«تەرگەۋ اياقتالعانعا دەيىن مەن كىمنىڭ كىنالى ەكەنىن ايتا المايمىن»، دەدى ماريپوۆ.
ەندى نارازىلىق بىلدىرۋشىلەر ۇكىمەت عيماراتىنا كوشتى.
ەستەرىڭىزگە سالا كەتەيىك، جاقىندا ۇرلانعان قىز بەن ونى ۇرلاپ اكەتكەن ادامنىڭ دەنەلەرى جاتقان كولىك تابىلعانى بەلگىلى بولدى.
پوليتسيانىڭ الدىن-الا اقپاراتى بويىنشا، ەر ادام قاقتىعىس كەزىندە قىزدى تۇنشىقتىرىپ ولتىرگەن، سودان كەيىن پىشاق جاراقاتىن سالىپ، ءوز-وزىنە قول جۇمساعان.
"ادىرنا" ۇلتتىق پورتالى
