ماسكەۋدە قازاقتىڭ سوڭعى حانى كەنەسارى قاسىموۆ تۋرالى قولجازبانىڭ تۇپنۇسقاسى تابىلدى.
احمەت كەنەساريننىڭ تۋعان اكەسى كەنەسارى حان مەن ونىڭ ۇلى سادىق سۇلتان تۋرالى حيكايا بۇدان 130 جىل بۇرىن ورىس تىلىنە اۋدارىلىپ، تاشكەنت قالاسىندا جارىق كورگەن. الايدا قولجازبانىڭ تاعدىرى جايلى ۇزاق ۋاقىت بويى ەشقانداي اقپارات بولماعان ەدى. قۇجات ماسكەۋدەگى مەملەكەتتىك تاريحي مۇراجايدىڭ جازبا كوزدەرى بولىمىنەن تابىلدى. مۇنى رەسەيلىك تاريحشى يليا زايتسەۆ جاريالادى. قولجازبا قازاق تىلىندە اراب قارپىمەن جازىلعان. «بۇل تابىستىڭ شىعىستانۋشى عالىمدار ءۇشىن ماڭىزى زور»، - دەيدى رەسەيلىك تاريحشىلار، سەبەبى بۇل قۇجاتتى جاريالاۋ قازاق تاريحىنىڭ جاڭا بەتتەرىن اشۋ باعىتىنداعى اۋقىمدى جۇمىستىڭ جالعاسى بولىپ تابىلادى. «بۇل كىتاپ ءحىح عاسىرداعى قازاق مادەنيەتىنىڭ ەسكەرتكىشى رەتىندە سول كەزدە بولعان تاريحي وقيعالاردى قازاق حالقى تۇرعىسىنان باعالاۋعا مۇمكىندىك بەرەدى»، - دەيدى عالىمدار. كەنەسارى قاسىموۆ جانە ونىڭ ۇلى سادىق تۋرالى ەستەلىكتەر قازاقستان ەلشىلىگىنىڭ قولداۋىمەن ماسكەۋدە جاريالانعان. وسىعان وراي رەسەي استاناسىندا كورنەكتى شىعىستانۋشىلار، زەرتتەۋشىلەر مەن جۋرناليستەردىڭ قاتىسۋىمەن دوڭگەلەك ۇستەل ءوتتى.
يليا زايتسەۆ، شىعىستانۋشى:
- بىزدە ەندى تۇپنۇسقانىڭ ءوزى بار. بۇل – XIX عاسىرداعى قازاق تاريحىنان سىر شەرتەتىن اسا ماڭىزدى جادىگەر. حيكايانى احمەت كەنەسارين قولىندا بولعان قۇجاتتار مەن ەستەلىكتەرگە سۇيەنىپ، اكەسى كەنەسارى قاسىموۆ پەن ونىڭ ۇلى سادىق سۇلتاننىڭ ءومىربايانىن ەگجەي-تەگجەيلى جازعان.
24.kz
