قازاقستاننىڭ تۇڭعىش پرەزيدەنتى "سامۇرىق-قازىنا" ۇلتتىق ءال-اۋقات قورى" اكتسيونەرلىك قوعامى باسقارماسىنىڭ توراعاسى الماسادام ساتقاليەۆتى قابىلدادى، دەپ حابارلادى ەلباسىنىڭ ءباسپاسوز قىزمەتى.
كەزدەسۋدە نۇرسۇلتان نازارباەۆقا ۇلتتىق ءال-اۋقات قورىنىڭ بىلتىرعى جانە 2021 جىلدىڭ ءبىرىنشى توقسانىنداعى جۇمىس ناتيجەلەرى، سونداي-اق "سامۇرىق-قازىنا" قورىن باسقارۋ جونىندەگى كەڭەستىڭ وتىرىستارىندا بەرىلگەن تاپسىرمالاردىڭ ورىندالۋ بارىسى تۋرالى اقپارات بەرىلدى.
"سامۇرىق-قازىنا" قورى 2020 جىلدى تابىستى اياقتادى. بىلتىر قور كومپانيالارىندا قىزمەتكەرلەردىڭ سانى ايتارلىقتاي قىسقارتىلعان جوق، ۇزدىكسىز وندىرىستىك پروتسەسس ساقتالدى. 2020 جىلدىڭ قورىتىندىسى بويىنشا قور اكتيۆتەرىنىڭ قۇنى 13,9 تريلليون تەڭگەگە جەتتى", – دەدى نۇرسۇلتان نازارباەۆ.
ساتقاليەۆ ەلباسىعا قوردى ينۆەستيتسيالىق حولدينگ رەتىندە قايتا قۇرۋ شارالارى جانە الداعى نەگىزگى باسىمدىقتار تۋرالى باياندادى.
قازاقستاننىڭ تۇڭعىش پرەزيدەنتى قور ەلىمىزدىڭ ۇلتتىق بايلىعى ەكەنىنە توقتالىپ، ونىڭ اكتيۆتەرىن بارشا حالىقتىڭ يگىلىگى ءۇشىن ەسەلەۋ جۇمىستارىن جالعاستىرۋ قاجەتتىگىن اتاپ ءوتتى.
"از ۋاقىت ىشىندە قور جۇمىسىن جانداندىرىپ، شۇعىل شارالار قابىلداندى. ستراتەگيالىق ماڭىزى بار سالالار قالىپتى جۇمىس ىستەپ تۇر. 2020 جىلى قور مەملەكەتتىك بيۋدجەتكە 870 ميلليارد تەڭگە اۋداردى", – دەدى نۇرسۇلتان نازارباەۆ.
سونداي-اق ەلباسى قور كومپانيالارىنىڭ تيىمدىلىگىن ودان ءارى ارتتىرۋ ءۇشىن ناقتى شارالار قابىلداۋدىڭ ماڭىزدىلىعىن ايتتى.
كەزدەسۋ سوڭىندا ۇلتتىق ءال-اۋقات قورىن باسقارۋ جونىندەگى كەڭەستىڭ توراعاسى الماسادام ساتقاليەۆكە بىرقاتار ناقتى تاپسىرما بەرىپ، جەمىستى ءارى تابىستى جۇمىس ىستەۋىنە تىلەكتەستىگىن ءبىلدىردى.
