Jerdi sheteldikterge satýǵa da, jalǵa berýge de tyıym salynady. Búgin Májilistiń jalpy otyrysynda zań jobasy qabyldandy, dep habarlaıdy "Adyrna" ulttyq portaly Tengrinews.kz-siltep.
⠀
"Elimizdiń egemendigin nyǵaıtý jáne halyqtyń azyq-túlik qaýipsizdigin qamtamasyz etý maqsatynda, Qazaqstan azamattarynyń pikirin eskere otyryp, 2016 jyldyń 6 mamyrynda Qazaqstan Respýblıkasynyń Prezıdenti Jarlyǵymen aýyl sharýashylyǵy jerlerin sheteldikterge, azamattyǵy joq adamdarǵa, sheteldik kompanııalarǵa sondaı-aq, sheteldik úlesi bar qazaqstandyq kompanııalarǵa jalǵa berýge, budan basqa Qazaqstannyń azamattary men zańdy tulǵalaryna aýyl sharýashylyǵy jerlerine jeke menshikke berýge qatysty moratorıı engizildi. Moratorıı merzimi 2021 jyldyń 31 jeltoqsanda aıaqtalatynyn eskere otyryp, Qazaqstan Respýblıkasynyń Prezıdenti Qasym-Jomart Kemeluly Toqaev aǵymdaǵy jyly 25 aqpandaǵy Ulttyq qoǵamdyq senim keńesiniń besinshi otyrysynda jer máselesi qashanda halqymyz úshin asa mańyzdy ekendigin jarııalaı otyryp, sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyıym salýdy tapsyrdy", - deıdi aýyl sharýashylyǵy mınıstri Saparhan Omarov.
⠀
Osyǵan oraı, tıisti zań jobasy ázirlenip, bıyl 15 naýryzda Májiliske engizilgen bolatyn. Búgin depýtattarǵa usynylǵan Zań jobasynda aýyl sharýashylyǵy jerlerin sheteldikterge jáne sheteldik kompanııalarǵa, sheteldik úlesi bar qazaqstandyq kompanııalarǵa, azamattyǵy joq adamdarǵa, halyqaralyq qatysýy bar ǵylymı ortalyqtarǵa sondaı-aq, qandastarǵa berýge tolyq tyıym salý kózdelgen.
"Sonymen qatar, zań jobasynda budan buryn sheteldiktermen jáne sheteldik úlesi bar qazaqstandyq kompanııalarmen jalǵa alynǵan aýyl sharýashylyǵy jerleriniń paıdalaný merzimin uzartylmaıtyndyǵy jáne olardyń paıdalaný merzimi aıaqtalǵanǵa deıin ǵana ıelikte bolatyny qarastyrylǵan", - dedi Saparhan Omarov.
Zań jobasyn talqylaý aıaqtalǵannan keıin QR Parlamenti Májilisiniń tóraǵasy Nurlan Nyǵmatýlın mańyzdy qujat maquldanǵanyn aıtty.
"Memleket basshysy Qasym-Jomart Kemeluly Toqaevtyń tapsyrmasymen ázirlengen qujattyń nátıjesinde halqymyzdyń nazarynda júrgen naqty suraq boıynsha sheshim qabyldandy. Endi jerimizdi sheteldikterge satýǵa da, jalǵa berýge de tolyq tyıym salynady".
"Adyrna" ulttyq portaly
