ناۋرىزدا قازاقستاندا بەنزين قىمباتتادى. نۇر-سۇلتاندا، الماتىدا جانە شىمكەنتتە اي-92 ماركالى جانارمايى 160 تەڭگەدەن، ورتا ەسەپپەن 10 تەڭگەدەن ارتىق تولەي باستادى. مۇناي-گاز سالاسىنىڭ مامانى، «ءبايدىلدينوۆ. مۇناي» باعدارلاماسىنىڭ جۇرگىزۋشىسى ولجاس ءبايدىلدينوۆ مۇنداي قىمباتشىلىقتىڭ نە ءۇشىن بولىپ جاتقانىن ءتۇسىندىردى، دەپ حابارلايدى "ادىرنا" ۇلتتىق پورتالى دەرەككوزگە سىلتەمە جاساپ.
بەنزين باعاسىنىڭ قىمباتتاعانى تۋرالى جاڭالىقتاردان كەيىن ەنەرگەتيكا مينيسترلىگى جانار-جاعارماي قۇنىن باسقارما كوتەرمەيدى دەپ حابارلاما تاراتتى. بۇگىنگى كۇنى ىشكى نارىقتاعى مۇناي ونىمدەرىنىڭ باعالارى رەتتەلمەيدى جانە ولاردى سۇرانىس پەن ۇسىنىسقا نەگىزدەلگەن نارىق انىقتايدى.
تۇتىنۋشىلار ءۇشىن سوڭعى باعانىڭ كوتەرىلۋى مۇناي ونىمدەرىنىڭ كوتەرمە باعاسىنا، جانارماي بەكەتتەرىنە دەيىنگى بارلىق كولىك شىعىندارىنا، مۇناي بازالارىندا ساقتاۋعا، بولشەك ساۋدا ديستريبيۋتورىنىڭ شىعىستارىنا، سونداي-اق اكتسيزدەر مەن سالىقتارعا نەگىزدەلگەن. ساراپشى ولجاس ءبايدىلدينوۆ باعانىڭ ءوسۋى كوپتەگەن فاكتورلارمەن، سونىڭ ىشىندە ۆاليۋتا باعامىمەن، ينفلياتسيامەن تىكەلەي بايلانىستى دەپ ءتۇسىندىردى.
وتكەن جىلى باعالار ءوسۋى كەرەك ەدى. شىندىعىندا، ءبىر جىل بۇرىن قازاقستان رەسپۋبليكاسىندا بەنزين وزىندىك قۇنىنان تومەن ساتىلدى. مىسالى، مۇناي ءبىزدىڭ زاۋىتتارعا باررەلىنە شامامەن 30 دوللار باعامەن جەتكىزىلەدى، ياعني الەمدىك باعادان ەكى ەسە تومەن. ەگەر باررەل شيكى مۇنايدىڭ ءليترىن اۋداراتىن بولساق، وندا الەمدىك نارىقتا ءبىر ليتر قازاقستاندىق مۇناي شامامەن 170 تەڭگەنى قۇرايدى، ال بەنزين قازىر ليترىنە 160-165-تەن ساتىلۋدا. ياعني، دايىن ءونىم شيكىزاتقا قاراعاندا ارزان! قايماق سۇتتەن ارزان بولعان سياقتى. مۇنداي جاعداي بۇرىن-سوڭدى بولماعان. ياعني، كەز-كەلگەن تاۋار سياقتى مۇنايدىڭ دا وزىندىك قۇنى بار جانە ول جىل سايىن ۆاليۋتا باعامى، ينفلياتسيا، ونىڭ ىشىندە جالاقىنىڭ ءوسۋى ەسەبىنەن وسەدى. مۇناي مەن قىزمەت كورسەتۋ سالاسىنىڭ قىزمەتكەرلەرى ونى مەزگىل-مەزگىل تالاپ ەتىپ وتىرادى، - دەدى ول.
ول قازاقستان ەڭ ارزان بەنزين ساتاتىن 10 ەلدىڭ قاتارىنا ەنەتىنىن اتاپ ءوتتى. دالىرەك ايتساق 8-ورىندا. سونىمەن بىرگە، قازاقستانمەن كورشىلەس ەلدەردە بەنزين ورتاشا ەسەپپەن 60-100 تەڭگەگە قىمباتتايدى.
"ماسەلەن، رەسەيدە جىل باسىنان بەرى بولشەك ساۋدا باعاسى 3% -عا ءوسىپ، اي-92 ماركالى بەنزين 270 تەڭگەگە جەتتى. ارينە، قازاقستانداعى ارزان بەنزين كورشىلەس ەلدەرگە كولەڭكەلى جەتكىزىلىمدەر ءۇشىن قولايلى جاعداي جاسايدى، ءدال سولاي بولىپ جاتىر دا. مىسالى، ءبىزدىڭ سولتۇستىك وبلىستاردا كەيبىر كەزەڭدەردە بەنزيندى تۇتىنۋ، ميلليونەر قالا شىمكەنتتەن دە جوعارى! ويتكەنى، بەنزيننىڭ ءار ليترىنەن 80-100 تەڭگە پايدا تاۋىپ، ەكسپورتقا شىعارىلاتىنىن بارلىعى تۇسىنەدى", دەدى ول.
بيىل ەلىمىزدە ەكى مۇناي وڭدەۋ زاۋىتى جاڭارتىلۋدا. باعانىڭ ءوسۋى مۇناي وڭدەۋ زاۋىتىن جوندەۋگە بايلانىستى بولدى ما دەگەن سۇراققا ساراپشى كەلەسىدەي جاۋاپ بەردى:
ء"موز-ءدى (مۇناي وڭدەۋ زاۋىتى) جوسپارلى جانە جوسپاردان تىس جوندەۋ، ارينە، ىشكى نارىققا اسەر ەتۋى مۇمكىن. دەگەنمەن، ۇكىمەت بۇل ماسەلەنى ءاردايىم باقىلاۋدا ۇستايدى جانە جوسپارلى جوندەۋ جۇمىستارىنا دەيىن ءاردايىم قورلاردىڭ قولايلى دەڭگەيىن قامتاماسىز ەتۋ مىندەتى تۇرادى. قازىرگى ۋاقىتتا جانار-جاعارماي تاپشىلىعى سەزىلمەيدى. بۇل دا جاقسى. «بەنزين تەك تالونمەن» دەگەن بەلگىلەردى كەزدەستىرگەن كەزدەر بولدى. الايدا، باعا ءالى دە وسەدى. قازاقستان مەن كورشى ەلدەر اراسىنداعى الشاقتىق تىم ۇلكەن", دەپ قوستى ساراپشى.
"ادىرنا" ۇلتتىق پورتالى
