قازاقستاندىق كينوگەرلەر باتىر قىز ءاليا مولداعۇلوۆا تۋرالى كوركەم ءفيلمدى تۇسىرۋگە دايىندالىپ جاتىر، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
فيلم ءاليا مولداعۇلوۆانىڭ 100 جىلدىعىنا جانە جەڭىستىڭ 80 جىلدىعىنا وراي «ءاليا» تولىقمەتراجدى كوركەم ءفيلمى بولىپ 2025 جىلدىڭ مامىر ايىندا جارىققا شىعادى دەپ جوسپارلانۋدا.
قازاقتىڭ باتىر قىزى تۋرالى «ءاليا» ءفيلمىنىڭ ستسەناريىن ماسكەۋلىك جۋرناليست، تەلەجۇرگىزۋشى ءارى اكتريسا الەنا كۋلەشوۆا جازدى.
جوبانىڭ باس پروديۋسەرى جانە ستسەناريستەرىنىڭ ءبىرى - الەكساندر شۋحوۆ. وعان فيلم ءتۇسىرۋ يدەياسى 2019 جىلى كەلگەن.
«قازاقتىڭ باتىر قىزى ءاليا مولداعۇلوۆا ەكىنشى دۇنيەجۇزىلىك سوعىسقا اتتانعاندا ءجاسوسىپىرىم بولدى. قولىنا قارۋ الىپ، مەرگەندىك تانىتقان ول 78 جاۋ اسكەرىنىڭ كوزىن جويىپ، كەڭەس وداعىنىڭ باتىرى اتاعىن الدى. بۇل وقيعا ماسكەۋلىك جۋرناليست، تەلەجۇرگىزۋشى جانە اكتريسا الەنا كۋلەشوۆانى باۋراپ العانى سونشالىق، ءومىرىنىڭ ءۇش جىلىن بيوپيكتىڭ ستسەناريىن جازۋعا ارنادى. ميفتەر مەن اڭىزداردان باس تارتىپ، الەنا ءومىردىڭ شىنايى شىندىعىن ىزدەدى. ول ءاليانى جاقسى بىلەتىن ادامداردى تاۋىپ، ولارمەن اڭگىمەلەستى»، - دەدى الەكساندر شۋحوۆ.
ونىڭ ايتۋىنشا، جوباعا 900 ملن تەڭگەدەن استام قاراجات جۇمسالادى دەپ جوسپارلاعان. ءفيلمنىڭ ءتۇسىرىلىم جۇمىستارى قازاقستاننان بولەك بەلارۋس ەلىندە ءوتۋى مۇمكىن.
«ءاليا» ءفيلمىنىڭ رەجيسسەرى — الەن نيازبەكوۆ.
«ءبىز تەك سەنىمدى، ساراپشىلار راستايتىن جانە مويىندايتىن فاكتىلەردى قولدانۋدى ماقسات ەتتىك. ماسكەۋ اسكەري مۇراعاتتارىنداعى جۇمىس ناتيجەسىندە درامالىق ماتەريال ءۇشىن دالەلدەنگەن نەگىز جينالدى»، - دەيدى رەجيسسەر.
9 مامىردا جالپىۇلتتىق كاستينگ وتپەك. شىعارماشىلىق توپ باستى رولدە وينايتىن اكتريسانى قازاقستان تۇرعىندارى اراسىنان ىزدەيدى.
«ءبىز ستسەناريمەن تانىستىق. ءاليانىڭ وبرازىن اشاتىن 15-16 جاستاعى، بويى 150-155 سم بولاتىن قازاق قىزىن ءالى تاپپادىق، بۇكىل قازاقستان بويىنشا كەڭ اۋقىمدى اشىق كاستينگ جاريالايمىز»، - دەدى كاستينگ ديرەكتورى گۇلزۋرا ەسەن.
ءفيلمنىڭ ءتۇسىرىلىمى كۇزدە باستالىپ، قىستا اياقتالماق.
