«ساليقالى ۇرپاق» قوعامدىق قورى تالدىقورعان قالاسىنداعى الەۋمەتتىك جاعىنان از قامتىلعان وتباسىلار، زەينەتكەرلەر مەن مۇمكىندىگى شەكتەۋلى ازاماتتار، سونداي-اق، كوپبالالى، جالعىزباستى انالارعا «كوكتەمنىڭ مەيىرىمدىلىك قورجىنى» ازىق-تۇلىك سەبەتىن ۇلەستىردى.
ءار وتباسىعا ەت كونسەرۆىلەرى، داقىلدار، ۇن، ماي، كونديتەرلىك ونىمدەر سىندى 11 ءتۇرلى تاۋار قامتىلعان، جالپى سالماعى 50 كيلوگراممدىق ءۇش قوراپتان تۇراتىن ازىق-تۇلىك جيىنتىعى جەتكىزىلدى. قايىرىمدىلىق ناۋقانىنىڭ ماقساتى – مۇقتاج جاندارعا كومەك كورسەتۋ، ناۋرىز مەرەكەسىنىڭ ءمان-ماڭىزىن ايشىقتاۋ، جاقسىلىق پەن مەيىرىمدىلىكتى دارىپتەۋ. «ساليقالى ۇرپاق» قورىنىڭ ديرەكتورى قاسىم قاسابەكوۆ: «پاندەميا كەزەڭىندە قاشىقتان وقىتۋعا بايلانىستى قىركۇيەك ايىندا تالدىقورعان قالاسىنداعى وقۋشىلارعا 500 نوۋتبۋك سىيلاعان بولاتىنبىز. ىندەت ءالى دە ءورشىپ تۇر. وسى كەزەڭدە قيىندىق كورگەن وتانداستارىمىزعا قول ۇشىن سوزۋ ماقساتىندا ۇلىستىڭ ۇلى كۇنى قارساڭىندا اتالمىش اكتسيانى ۇيىمداستىردىق . بۇل رەتتە الماتى وبلىسى مەن الماتى قالاسىنىڭ 1500 از قامتىلعان وتباسىنا كومەك كورسەتۋ جوسپارلانۋدا»-دەدى.
