قازاقستاننىڭ حالىق جازۋشىسى، قازاقستان مەملەكەتتىك سىيلىعىنىڭ يەگەرى قابدەش ءجۇمادىلوۆ قايتىس بولدى، دەپ حابارلايدى "ادىرنا" ۇلتتىق پورتالى.
قارالى حابارعا قايعىرا كوڭىل ايتقان اقپارات ءمينيسترى ايدا بالاەۆا ءوز facebook پاراقشاسىندا پىكىر قالدىردى.
"بەلگىلى جازۋشى، كورنەكتى قالامگەر، قازاقستاننىڭ حالىق جازۋشىسى قابدەش ءجۇمادىلوۆ اعامىزدىڭ دۇنيەدەن وزۋىنا بايلانىستى مارقۇمنىڭ وتباسى مەن جاقىن-تۋعاندارىنىڭ قايعىلارىنا ورتاقتاسىپ كوڭىل ايتامىن.
قابدەش اعامىز بۇكىل سانالى عۇمىرىن ەلىمىزدىڭ رۋحانياتى مەن ۇلتتىق ادەبيەتىمىزدى دامىتۋعا ارناپ، كوركەم رومان جازۋ دارەجەسىن جاڭا بەلەسكە كوتەرگەن دەگدار جازۋشى، قارىمدى قوعام قايراتكەرى ەدى. كوزى تىرىسىندە زور شىعارماشىلىق وي-ورىسىمەن، تەرەڭ پاراساتىمەن حالقىنىڭ ۇلكەن ءىلتيپاتىنا بولەنىپ، ارتىنا وشپەيتىن رۋحاني مۇرا، ءورىستى ونەگە قالدىردى.
ارداقتى اعامىزدىڭ جارقىن بەينەسى مەن ۇلتتىق رۋحانياتتاعى ورنى قالىڭ قاۋىمنىڭ جۇرەگىندە ماڭگi ساقتالادى دەپ سەنەمىن.
مارقۇمنىڭ جاتقان جەرى جارىق، توپىراعى تورقا بولىپ، نۇرى پەيىشتە شالقىسىن", -دەپ جازدى مينيستر.
قابدەش ءجۇمادىلوۆ 1936 جىلى 24 ساۋىردە شىڭجاڭ ولكەسىنىڭ تارباعاتاي ايماعى، مالدىباي اۋىلىندا دۇنيەگە كەلگەن. اۋىلدا باستاۋىش ءبىلىم الىپ، كەيىن شاۋەشەك گيمنازياسىن بىتىرەدى. 1956 جىلى قىتاي ۇكىمەتىنىڭ جولداماسىمەن الماتىعا كەلىپ، قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا ءتۇستى.
الايدا ۋنيۆەرسيتەتتىڭ ەكىنشى كۋرسىنان كەيىن ەكى ەل اراسىنداعى ساياسي جاعدايعا بايلانىستى كەرى شاقىرىلىپ، 1958–1962 جىلدار ارالىعىندا قىتايدا قۋعىن-سۇرگىنگە ۇشىرادى. 1962 جىلى يمپەريا شەكاراسىن بۇزىپ وتكەن قازاق كوشىمەن بىرگە اتامەكەنگە قايتىپ ورالىپ، قازمۋ-دەگى اياقتالماي قالعان وقۋىن قايتا جالعاپ، 1965 جىلى ءبىتىرىپ شىقتى.
«قازاق ادەبيەتى» گازەتىندە (1965–1967), «جازۋشى» باسپاسىندا (1967–1976), مەملەكەتتىك باسپالار كوميتەتىندە (1976–1981) جاۋاپتى قىزمەتتەر اتقاردى.
"ادىرنا" ۇلتتىق پورتالى
