قازاقستان مۇسىلماندارى ءدىني باسقارماسى بيىل قاسيەتتى رامازان ايىنىڭ قاشان باستالاتىنىن، قادىر ءتۇنى جانە ورازا ايتتىڭ قاي كۇنگە سايكەس كەلەتىنىن ايتتى دەپ حابارلايدى، “ادىرنا” ۇلتتىق پورتالى muftyat.kz.-كە سىلتەمە جاساپ.
ءمۇفتياتتىڭ كەڭەيتىلگەن تورالقا ماجىلىسىندە شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربانۇلى بيىل رامازان ايى 13 ساۋىردە باستالىپ، 12 مامىردا اياقتالاتىنىن حابارلادى. «رامازان ايى 30 كۇن بولادى. 13 مامىر – ورازا ايت كۇنى. 8 مامىردان 9 مامىرعا قاراعان ءتۇن – قادىر ءتۇنى»، – دەيدى سانسىزباي قۇربانۇلى. جيىن بارىسىندا باس ءمۇفتي ناۋرىزباي قاجى تاعانۇلى جاماعاتتىڭ ىڭعايىنا قاراي ونلاين دارىستەر مەن قۇران ۇيرەتۋ ساباقتارىن وتكىزۋدى جالعاستىرۋ كەرەكتىگىن اتاپ ءوتتى سونداي-اق ول حالىققا پايدالى ۋاعىز تاراتۋ ماقساتىندا تىكەلەي ەفيرلەر ۇيىمداستىرىپ، مۇمكىندىگى جوق جاندارعا اۋىزاشار پاكەتتەرىن جەتكىزۋ شارالارىن دا قولعا الۋدى تاپسىردى.
«ساناۋلى كۇندەردەن سوڭ قاسيەتتى رامازان ايى كىرەدى. مۇسىلمان ۇمبەتى ءۇشىن رامازان – سونداي ءبىر ەرەكشە اي. ەلىمىزدەگى قانشاما باۋىرلارىمىز وسى ايدى كۇتەدى، ورازاسىن ۇستايدى. مەيىرىم مەن كەشىرىمگە، ساۋاپقا تولى ايدى ادەتتەگىدەي ءوز دەڭگەيىندە وتكىزۋدى اللا ءناسىپ ەتسىن! قازىرگى جاعدايدى ەسكەرە وتىرىپ، ەڭ باستىسى تازالىق پەن ءتارتىپ جاعىنا كوڭىل بولسەك. وسى ايدا مەيلىنشە قايىرىمدى ىستەردى كوبىرەك اتقارۋعا شاقىرامىن»، – دەيدى ناۋرىزباي قاجى تاعانۇلى.
ەسكە سالا كەتسەك، بۇعان دەيىن ءمۇفتيات بيىلعى ءپىتىر ساداقانىڭ مولشەرىن دە جاريا ەتكەن ەدى. بيىل ءپىتىر ساداقا مولشەرى – 420 تەڭگە.
