Qazaqstan musylmandary dinı basqarmasy bıyl qasıetti Ramazan aıynyń qashan bastalatynyn, Qadir túni jáne Oraza aıttyń qaı kúnge sáıkes keletinin aıtty dep habarlaıdy, “Adyrna” ulttyq portaly muftyat.kz.-ke silteme jasap.
Múftııattyń keńeıtilgen tóralqa májilisinde sharıǵat jáne pátýa bóliminiń meńgerýshisi Sansyzbaı Qurbanuly bıyl Ramazan aıy 13 sáýirde bastalyp, 12 mamyrda aıaqtalatynyn habarlady. «Ramazan aıy 30 kún bolady. 13 mamyr – Oraza aıt kúni. 8 mamyrdan 9 mamyrǵa qaraǵan tún – Qadir túni», – deıdi Sansyzbaı Qurbanuly. Jıyn barysynda bas múftı Naýryzbaı qajy Taǵanuly jamaǵattyń yńǵaıyna qaraı onlaın dárister men Quran úıretý sabaqtaryn ótkizýdi jalǵastyrý kerektigin atap ótti Sondaı-aq ol halyqqa paıdaly ýaǵyz taratý maqsatynda tikeleı efırler uıymdastyryp, múmkindigi joq jandarǵa aýyzashar paketterin jetkizý sharalaryn da qolǵa alýdy tapsyrdy.
«Sanaýly kúnderden soń qasıetti Ramazan aıy kiredi. Musylman úmbeti úshin Ramazan – sondaı bir erekshe aı. Elimizdegi qanshama baýyrlarymyz osy aıdy kútedi, orazasyn ustaıdy. Meıirim men keshirimge, saýapqa toly aıdy ádettegideı óz deńgeıinde ótkizýdi Alla násip etsin! Qazirgi jaǵdaıdy eskere otyryp, eń bastysy tazalyq pen tártip jaǵyna kóńil bólsek. Osy aıda meılinshe qaıyrymdy isterdi kóbirek atqarýǵa shaqyramyn», – deıdi Naýryzbaı qajy Taǵanuly.
Eske sala ketsek, buǵan deıin múftııat bıylǵy pitir sadaqanyń mólsherin de jarııa etken edi. Bıyl pitir sadaqa mólsheri – 420 teńge.
