قوستانايلىق جاستار ناۋرىز مەرەكەسى جانە تاۋەلىسىزدىكتىڭ 30 جىلدىعى اياسىندا «قايىرىمدىلىق جاشىگى» اكتسياسىن باستادى. سونداي شارالاردىڭ ءبىرى ونداي شارالاردىڭ ءبىرى التىنسارين اۋدانىندا قولعا الىندى. اۋداندىق جاستار رەسۋرستىق ورتالىعىنىڭ ۇيىمداستىرۋىمەن مادەنيەت ءۇيىنىڭ ءبىرىنشى قاباتىنان «جاقسىلىق جاشىگى» اشىلدى. ەرەكشەلىگى سول – مۇندا كەز كەلگەن تۇرعىن ءوز ەرىكتەرىمەن كيىم-كەشەك پەن باسقا دا تۇرمىستىق زاتتاردى اكەلە الادى. تيىسىنشە، وزىڭىزگە قاجەتتى زاتتاردى تەگىن الىپ كەتەسىز.
– قايىرىمدىلىق جاشىكتەرىنە جينالعان زاتتاردىڭ ءبارى پايدالانۋىنا قاراي ۋاقتىلى سۇرىپتالىپ، ەرىكتىلەر ارقىلى كومەككە ءزارۋ ادامدارعا جەتكىزىلەدى. كەي تۇرعىندار قارت كىسىلەرگە ارناپ كيىمدەر اكەلىپ جاتىر. مۇنىڭ ءبارى قۋانتادى. وسىناۋ ناۋرىز مەرەكەسىنىڭ ءتۇپ نەگىزى دە بەرەكە-بىرلىكتە، قايىرىمدىلىقتا جاتىر عوي. اۋدان جاستارى مۇنى تەرەڭ تۇسىنەدى. ءبىز الەۋمەتتىك جەلىلەردە جارناما جاساپ، تۇرعىنداردى قايىرىمدىلىققا شاقىرىپ جاتىرمىز. ولار ءوز مۇمكىندىگىنشە ازىق-تۇلىك پەن تۇرمىسقا قاجەتتى ءارى شارۋاشىلىق زاتتارىن قالدىرىپ، مۇقتاج جاندارعا جان-جاقتى قولداۋ كورسەتە الادى. بۇيىمدار تەك تازا، ءبۇتىن قالپىندا بولۋى كەرەك، - دەيدى اۋداندىق جاستار ورتالىعىنىڭ ماماندارى.
تۇرعىندار قولداپ، قايىرىمدىلار قاتارى كوبەيە تۇسسە، كەلەشەكتە جاشىكتەر سانىن تاعى كوبەيتەتىنىن ايتادى ۇيىمداستىرۋشى جاستار. بۇل شارا وبلىستىڭ ءار اۋدانىندا قولعا الىنعانىن ايتا كەتەيىك.
