اتىراۋدا تاۋەلسىزدىك مەرەيتويىنا ارنالعان «تۇيە پالۋان» سايىسى ءوتتى

1587
Adyrna.kz Telegram

اتىراۋ وبلىسىنىڭ اكىمى ماحامبەت دوسمۇحامبەتوۆ تاۋەلسىزدىكتىڭ 30 جىلدىعى اياسىندا قازاق كۇرەسىنەن ەرەسەكتەر اراسىندا ۇيىمداستىرىلعان «تۇيە پالۋان» سايىسىن كورىپ، جەڭىمپازداردى ماراپاتتادى.


سايىسقا ءوڭىردىڭ اۋىر سالماقتاعى پالۋاندارى قاتىسىپ، باق سىنادى. ءىس-شارا «قازاقستان – سپورتتىق ۇلت» جوباسى شەڭبەرىندە «بايتەرەك» سپورت كلۋبىنىڭ جۇلدەسىنە ارنالدى.

«بۇگىن سىزدەر ناعىز بىلەكتى دە جۇرەكتى پالۋانداردىڭ قۋاتتى كۇرەسى قانداي بولاتانىن كورسەتتىڭىزدەر. قازاق حالقىنىڭ ءتول ونەرىنىڭ تاريحى تەرەڭدە. عاسىرلار بويى كەلە جاتقان ۇلتتىق كۇرەسىمىزدى دامىتۋ مەن قولداۋ جاستارىمىزعا دا ۇلكەن رۋھ بەرەدى. ولاردىڭ نامىسىن جانىپ، ناعىز ەر-ازامات بولىپ قالىپتاسۋىنا وڭ ىقپال ەتەدى»،-دەگەن ايماق باسشىسى​ تاۋەلسىزدىگىمىزدىڭ ارقاسىندا ۇلتتىق سپورت تۇرلەرىنىڭ دە جاندانىپ كەلە جاتقانىنا توقتالدى. وعان ءاربىر سپورتشىنىڭ ولشەۋسىز ۇلەس قوسىپ كەلە جاتقانىن ايتا كەلە وبلىستا دا سپورتقا ايرىقشا كوڭىل بولىنۋدە ەكەنىن اتاپ ءوتتى.​ «جىل ساناپ سپورتتىق كلۋبتار مەن ءىرى كەشەندەر سانى ارتۋدا. ولاردا دايىندالاتىن جاس بۋىننىڭ دا قاراسى قالىڭ ەكەنى قۋانتادى. تاۋەلسىزدىكتىڭ 30 جىلىندا سپورتشىلارىمىز تالاي مارتە حالىقارالىق دودالاردا كوك بايراعىمىزدى جەلبىرەتتى. ولاردىڭ اراسىندا ەل تاريحىندا عانا ەمەس، الەم تاريحىندا ەسىمدەرىن التىن ارىپپەن جازدىرعان جەرلەستەرىمىز بار. ماسەلەن، پەكين وليمپياداسىنىڭ قولا جۇلدەگەرى ارمان چيلمانوۆ مەن ريو وليمپياداسىنىڭ جەڭىمپازى نيدجات راحيموۆتى اتىراۋلىقتار ەرەكشە ماقتان ەتەدى. ولاردىڭ جەڭىستى جولىن جالعايتىن جاستارعا جاعداي جاساۋ جالعاسادى»،-دەدى وبلىس اكىمى ماحامبەت دوسمۇحامبەتوۆ.

​الىپتاردىڭ كۇرەسىن سپورت جانكۇيەرلەرى باستان-اياق الەۋمەتتىك جەلىلەر ارقىلى تاماشالادى. ​

پىكىرلەر