Atyraý oblysynyń ákimi Mahambet Dosmuhambetov Táýelsizdiktiń 30 jyldyǵy aıasynda qazaq kúresinen eresekter arasynda uıymdastyrylǵan «Túıe palýan» saıysyn kórip, jeńimpazdardy marapattady.
Saıysqa óńirdiń aýyr salmaqtaǵy palýandary qatysyp, baq synady. Is-shara «Qazaqstan – sporttyq ult» jobasy sheńberinde «Báıterek» sport klýbynyń júldesine arnaldy.
«Búgin sizder naǵyz bilekti de júrekti palýandardyń qýatty kúresi qandaı bolatanyn kórsettińizder. Qazaq halqynyń tól óneriniń tarıhy tereńde. Ǵasyrlar boıy kele jatqan ulttyq kúresimizdi damytý men qoldaý jastarymyzǵa da úlken rýh beredi. Olardyń namysyn janyp, naǵyz er-azamat bolyp qalyptasýyna oń yqpal etedi»,-degen aımaq basshysy Táýelsizdigimizdiń arqasynda ulttyq sport túrleriniń de jandanyp kele jatqanyna toqtaldy. Oǵan árbir sportshynyń ólsheýsiz úles qosyp kele jatqanyn aıta kele oblysta da sportqa aıryqsha kóńil bólinýde ekenin atap ótti. «Jyl sanap sporttyq klýbtar men iri keshender sany artýda. Olarda daıyndalatyn jas býynnyń da qarasy qalyń ekeni qýantady. Táýelsizdiktiń 30 jylynda sportshylarymyz talaı márte halyqaralyq dodalarda kók baıraǵymyzdy jelbiretti. Olardyń arasynda el tarıhynda ǵana emes, álem tarıhynda esimderin altyn árippen jazdyrǵan jerlesterimiz bar. Máselen, Pekın Olımpıadasynyń qola júldegeri Arman Chılmanov men Rıo Olımpıadasynyń jeńimpazy Nıdjat Rahımovty atyraýlyqtar erekshe maqtan etedi. Olardyń jeńisti jolyn jalǵaıtyn jastarǵa jaǵdaı jasaý jalǵasady»,-dedi oblys ákimi Mahambet Dosmuhambetov.
Alyptardyń kúresin sport jankúıerleri bastan-aıaq áleýmettik jeliler arqyly tamashalady.
