زاڭگەرلەر، كريميناليستەر جانە سوت ساراپشىلارى اياجان ەدىلوۆانى ولتىرگەن جىگىتتىڭ قىلمىستىڭ ىزدەرىن جاسىرۋ ءۇشىن قاتىگەز ارەكەتكە باردى دەگەنگە كۇماندانادى. قۇربانىنىڭ تەرىسىن كەسىپ العان كۇدىكتى ءبارىن شۇعىل تۇردە، ەش ابىرجىماي جاساعان، دەيدى ولار. وسىعان وراي، ساراپشىلار ايىپتالۋشى بۇل ارەكەتتى ءبىرىنشى رەت جاساعانىنا سەنبەيدى، دەپ حابارلايدى «ينفورمبيۋرو» جاڭالىقتار باعدارلاماسى.
19 جاستاعى اياجان وقۋعا، Aya Lan جەكە كيىم برەندىن دامىتۋعا جانە سۇلۋلىق سالونىندا جۇمىس ىستەۋگە ۇلگەرگەن. قىزدى تانيتىندار ونىڭ اقشاعا مۇقتاج بولماعانىن ايتادى.
اياجان تۇرعان ستۋدەنتتەر جاتاقحاناسىنا تۇنگى 23:00-گە دەيىن كەلۋ مىندەتتى ەكەن. بىراق 19 ناۋرىزدا بويجەتكەن العاش رەت ستۋدەنتتەر جاتاقحاناسىنا ۋاقىتىلى ورالماپتى.
«سول كۇنگە دەيىن اياجان ۇيدە تۇنەمەگەنىن نەمەسە تۇندەلەتىپ جۇرەتىنىن ەشقاشان بايقامادىم. سوندىقتان ءبىز دە، دوستارى دا دابىل قاعىپ، جوعالعان كۇنى ىزدەي باستادىق. ول ءبىلىمدى، جاۋاپتى بولدى»، - دەدى جاتاقحانا مەڭگەرۋشىسى مارال اۋباكىروۆا.
ايتا كەتەيىك، پوليتسيا مالىمەتىنشە اياجان ەدىلوۆا 19 ناۋرىزدا تۇنگى ساعات 11-دە قازا تاپتى. ەرىكتىلەر ىزدەستىرۋ جۇمىستارىن جۇرگىزىپ، 21 ناۋرىزدا قىزدى نۇركەنت ىقشام اۋدانىنا الىپ بارعان تاكسي جۇرگىزۋشىسىن انىقتاعان. ەرىكتىلەردەن تۇسكەن اقپارات بويىنشا پوليتسەيلەر قىلمىس ورنىنا بارعان. كەيىنىرەك قىزدىڭ دەنەسىنىڭ بولىكتەرى مەگاپوليستىڭ ءارتۇرلى ايماقتارىنان تابىلىپتى. ونىڭ تۋىستارى كىسى ءولتىرۋشىنىڭ قاتىگەزدىگى تۋرالى ايتۋدا. كۇدىكتى مارقۇمنىڭ باسىن قايناتىپ، تىرناعى مەن تىستەرىن جۇلىپ العان.
كۇدىكتى راحمانبەردى تورەبەكوۆ 2010 جىلى مەديتسينالىق اكادەمياعا تۇسكەنى بەلگىلى. ءبىر جىلدان كەيىن ناشار ۇلگەرىمى ءۇشىن وقۋدان شىعارىلدى. 2012 جىلى وڭتۇستىك قازاقستان وبلىسىنىڭ مەداكادەمياسىنا گرانتقا تۇسكەن. بىراق ەكىنشى كۋرستان كەيىن سول جەردەن دە شىعارىلدى.
اسا اۋىر قىلمىستىق ىستەر بويىنشا ادۆوكات بولىپ جۇمىس ىستەيتىن تاجىريبەلى زاڭگەر قادىرجان عالىمجانۇلى كۇدىكتىنىڭ قىلمىستى جالعىز جاساعانىنا كۇمان كەلتىرمەيدى. دەسەك تە قولدا بار دالەلدەردى تەرگەۋ توبى مۇقيات تەكسەرۋى كەرەك.
«مەديتسينا ۋنيۆەرسيتەتىنىڭ ستۋدەنتتەرى وقۋ كەزىندە ماماندىق بويىنشا مايىتحاناعا بارادى. بۇل مىندەتتى. سوندىقتان ول ءبارىن جالعىز جاساي الادى. بۇل ءبىرىنشى رەت جاسالعان قىلمىس بولماۋى مۇمكىن. ول ەش ساسپاعان، ابىرجىماعان. 19 ناۋرىزدان 20 ناۋرىزعا قاراعان ءتۇنى قىزدى ءولتىرىپ، سول ءتۇنى دەنەسىن دالاعا لاقتىردى»، - دەيدى زاڭگەر قادىرجان عالىمجانۇلى.
اياجان ەدىلوۆانىڭ ولىمىنە كۇدىكتى راحمانبەردى تورەبەكوۆ تۇركىستان وبلىسىنىڭ جاۋشىقۇم اۋىلىندا تۇرعان. ونىڭ تۋىستارى سۇحباتتان باس تارتتى. مەكتەپ مۇعالىمدەرى ۇزدىك تۇلەكتىڭ وسىنداي قاتىگەز كىسى ولتىرگەنىنە سەنبەيدى.
«ءبىز ەسەڭگىرەپ قالدىق! ول وتە اقىلدى، دارىندى ەدى»، - دەدى شاردارا اۋدانى مەكتەبىنىڭ ديرەكتورى روزا جۇنىسقۇلوۆا.
تەرگەۋ بۇل ءىس بويىنشا اقپاراتتى جاريا ەتپەيدى، بىراق رەزونانستى ەسكەرە وتىرىپ، سۇراقتارعا ەرتە مە، كەش پە جاۋاپ بەرۋگە تۋرا كەلەدى. اياجاننىڭ ءولىمى قوعامدى ءدۇر سىلكىندىردى، كوپشىلىك قىزدارىنىڭ قاۋىپسىزدىگى ءۇشىن الاڭدايدى.
