شقو اقپارات ورتالىعىندا وتكەن ءباسپاسوز ءماسليحاتىندا سۋ تاسقىنى كەزەڭى تۋرالى ءسوز ەتىلدى، دەپ حابارلايدى “ادىرنا” ۇلتتىق پورتالى Nege.kz سايتىنا سىلتەمە جاساپ.
شقو تجد باستىعىنىڭ ورىنباسارى دميتري تيتوۆتىڭ ايتۋىنشا، وڭىردەگى بىرنەشە اۋداندا سۋ تاسقىنى قاۋپى بار.
«التاي، بەسقاراعاي، گلۋبوكوە، كاتونقاراعاي، كوكپەكتى جانە تارباعاتاي اۋداندارىنداعى 19 ەلدى مەكەندە سۋ تاسقىنى بولۋى ىقتيمال. قۇتقارۋشىلار مەن جەرگىلىكتى اتقارۋشى ورگان وكىلدەرى تاسقىننىڭ الدىن الۋعا جانە ونىڭ سالدارىن بارىنشا ازايتۋ ماقساتىندا بىرقاتار شارالاردى قولعا العان»، – دەدى ول.
شقو جۇمىلدىرۋ دايىندىعى باسقارماسىنىڭ باسشىسى ەلدوس چيكەنوۆتىڭ مالىمەتىنشە، وڭىردە 564 مىڭ تەكشە مەتر قار شىعارىلعان.
كولىك جانە تەمىر جولدارداعى سۋ وتكىزگىشتەر، كوپىرلەر، ارىقتار مەن كانالدار تازالاندى.
رەسپۋبليكالىق جانە وبلىستىق جولدار بويىنشا 271 كوپىر مەن 2871 سۋ وتكىزگىش تازالانعان.
«قازىرگى ۋاقىتتا وبلىستا جازىق اۋماقتا قاردىڭ ەرۋىمەن جانە وزەندەردىڭ اشىلۋىمەن بايلانىستى سۋ تاسقىنىنىڭ العاشقى تولقىنى بولىپ جاتىر. گيدرولوگيالىق جاعداي تۇراقتى. وزەندەردەگى سۋ دەڭگەيى قاۋىپتى دەڭگەيدەن تومەن. بۇل كەزەڭ ناۋرىزدىڭ ەكىنشى ونكۇندىگىنىڭ سوڭىنان ءساۋىردىڭ ەكىنشى ونكۇندىگىنىڭ اياعىنا دەيىن جالعاسادى. سەڭ جۇرگەن كەزدە بۇقتىرما، كۇرشىم، قالجىر، ەرتىس، ءۇلبى، ۋبا، تۇرعىسىن وزەندەرىندە مۇز كەپتەلىسى پايدا بولادى»، – دەدى ەلدوس چيكەنوۆ.
وبلىستىق تجد جەكە قۇرامى كۇشەيتىلگەن جۇمىس رەجيمىنە كوشتى.
ءوڭىر اۋماعىندا 2412 تەحنيكا مەن 370 موتوپومپادان تۇراتىن ارنايى توپ قۇرىلىپ، 104 ەۆاكوپۋنكت دايىندالعان.
