شىمكەنتتە قايتارىمسىز گرانتقا وتىنىشتەر تەلەگرام-بوت ارقىلى قابىلدانادى

3824
Adyrna.kz Telegram

شىمكەنت قالاسىندا بۇگىن قايتارىمسىز گرانتقا قۇجات قابىلداۋ باستالدى. بيىلعى سانيتارلىق-ەپيدەميولوگيالىق جاعدايعا بايلانىستى گرانتقا ءوتىنىش ءبىلدىرۋ ونلاين فورماتتا جۇزەگە اسىرىلاتىن بولادى.

ازاماتتاردىڭ قۇجاتتارى Telegram جەلىسىندەگى @enbekshymkentBot بويىنشا 2021 جىلدىڭ 26 ناۋرىزى 09.00-دەن كەشكى 19.00-گە دەيىن قابىلدانادى.

وسى گرانتقا قۇجات تاپسىرۋ شارتتارى تۋرالى تولىق اقپارات بەرۋ ماقساتىندا شىمكەنت قالاسىنىڭ جۇمىسپەن قامتۋ ورتالىعىنىڭ ماماندارى «SHANYRAQ» وتباسى ينستيتۋتىن قولداۋ ورتالىعىنا كەلىپ، كوپبالالى انالارعا ءتۇسىندىرۋ جۇمىستارىن جۇرگىزدى.

بۇل جولعى قۇجات تاپسىرۋشىلار ىشىنەن 600 ءوتىنىش بەرۋشىنىڭ گرانت يەسى اتانۋ مۇمكىندىگى بار. سونىمەن قاتار جۇمىسسىز، ءارى اتاۋلى الەۋمەتتىك كومەك الىپ وتىرعان، ءبىر جاسقا تولماعان بالاسى بار انالار دا قۇجات تاپسىرۋىنا بولادى.

بىراق ايەل جۇمىس ىستەپ ءجۇرىپ، دەكرەتتىك دەمالىسقا شىعىپ، جۇمىس ورنى ساقتالىپ تۇرسا گرانتقا قۇجات تاپسىرا المايدى، سەبەبى جۇمىسسىز دەپ تانىلمايدى. گرانت يەگەرى اتانعان ااك الۋشىلار ءۇش ايدىڭ ىشىندە جەكە كاسىپكەر رەتىندە تىركەلىپ، گرانت قاراجاتىنىڭ ەسەبىن بەرۋى ءتيىس. ال جۇمىسسىز رەتىندە ءوتىنىش بەرىپ، گرانت الساڭىز جەكە كاسىپكەر رەتىندە تىركەلمەي، تەك بىرىڭعاي جيىنتىق تولەم، ياعني 2915 تگ تولەپ وتىرساڭىز دا بولادى.

سونىمەن قاتار، كەزدەسۋدە اتاۋلى الەۋمەتتىك كومەككە قاتىستى دا ساۋالدار تالقىلانىپ، تولىقتاي جاۋاپ بەرىلدى. وسى جىلدىڭ ەكىنشى توقسانىندا ااك اۆتوماتتى تۇردە ۇزارتىلمايتىنى، قايتادان قۇجات تاپسىرۋ قاجەتتىگى ايتىلدى.

ايتا كەتەتىن جاعداي، تەكسەرۋ بارىسىندا گرانت يەگەرى گرانت قاراجاتتارىن ماقساتسىز پايدالانىپ، باسقا باعىتتا جۇمساعانى انىقتالسا، باعدارلاما تالاپتارىنا سايكەس گرانت قاراجاتتارىن بيۋدجەتكە قايتارۋ بويىنشا ءتيىستى جۇمىستار اتقارىلاتىن بولادى.

شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر