Shymkent qalasynda búgin qaıtarymsyz grantqa qujat qabyldaý bastaldy. Bıylǵy sanıtarlyq-epıdemıologııalyq jaǵdaıǵa baılanysty grantqa ótinish bildirý onlaın formatta júzege asyrylatyn bolady.
Azamattardyń qujattary Telegram jelisindegi @enbekshymkentBot boıynsha 2021 jyldyń 26 naýryzy 09.00-den keshki 19.00-ge deıin qabyldanady.
Osy grantqa qujat tapsyrý sharttary týraly tolyq aqparat berý maqsatynda Shymkent qalasynyń jumyspen qamtý ortalyǵynyń mamandary «SHANYRAQ» Otbasy ınstıtýtyn qoldaý ortalyǵyna kelip, kópbalaly analarǵa túsindirý jumystaryn júrgizdi.
Bul jolǵy qujat tapsyrýshylar ishinen 600 ótinish berýshiniń grant ıesi ataný múmkindigi bar. Sonymen qatar jumyssyz, ári ataýly áleýmettik kómek alyp otyrǵan, bir jasqa tolmaǵan balasy bar analar da qujat tapsyrýyna bolady.
Biraq áıel jumys istep júrip, dekrettik demalysqa shyǵyp, jumys orny saqtalyp tursa grantqa qujat tapsyra almaıdy, sebebi jumyssyz dep tanylmaıdy. Grant ıegeri atanǵan AÁK alýshylar úsh aıdyń ishinde jeke kásipker retinde tirkelip, grant qarajatynyń esebin berýi tıis. Al jumyssyz retinde ótinish berip, grant alsańyz jeke kásipker retinde tirkelmeı, tek biryńǵaı jıyntyq tólem, ıaǵnı 2915 tg tólep otyrsańyz da bolady.
Sonymen qatar, kezdesýde ataýly áleýmettik kómekke qatysty da saýaldar talqylanyp, tolyqtaı jaýap berildi. Osy jyldyń ekinshi toqsanynda AÁK avtomatty túrde uzartylmaıtyny, qaıtadan qujat tapsyrý qajettigi aıtyldy.
Aıta ketetin jaǵdaı, tekserý barysynda grant ıegeri grant qarajattaryn maqsatsyz paıdalanyp, basqa baǵytta jumsaǵany anyqtalsa, baǵdarlama talaptaryna sáıkes grant qarajattaryn bıýdjetke qaıtarý boıynsha tıisti jumystar atqarylatyn bolady.
Shymkent qalasy ákimdiginiń baspasóz qyzmeti
