الماتى وبلىسىندا كاسىپكەر ءبۇتىن ءبىر اۋىلدا بىلگەنىن ىستەپ ءجۇر. تالايدان بەرى مال جايىپ كەلگەن اۋماقتى مەنشىگىنە العان ول مولانى دا قازىپ تاستاعان دەيدى ۇلان اۋىلىنىڭ تۇرعىندارى. ەندى سول شۇڭقىرلاردان ادام سۇيەكتەرى شىعىپ جاتىر، دەپ حابارلايدى كتك ارناسى.
كتك ارناسىنىڭ حابارلاۋىنشا، شارۋا قوجالىعىما قاجەت دەپ قازىپ تاستاعان كولشىكتەردىڭ بىرىنە وتكەن اپتادا ءبىر بالا باتىپ كەتكەن. ەڭ سوراقىسى، ونىڭ قولدان توعان جاساۋىنا ەش رۇقساتى دا بولماعان.
ۇلان اۋىلىنىڭ قاق ورتاسىنداعى سايدا جۇرت تالايدان بەرى مالىن جايىپ كەلەدى. بالالار دا وسىندا وينايدى. اۋىل تۇرعىندارى ناۋرىز مەرەكەسىن دە وسى جەردە وتكىزىپ كەلگەن ەكەن. ەندى اۋماقتىڭ يەسى پايدا بولىپ، بۇدان بىلاي مۇندا ەشكىمدى كىرگىزبەيتىنىن مالىمدەپتى.
جەكە كاسىپكەر 24 گەكتاردان استام جەردى جەتى جىل بۇرىن ساتىپ العان ەكەن. ال بىلتىر كۇزدە مۇنداعى جەردى قازىپ جاساندى كولشىك جاساعان. ات شاپتىرىم جەردى مەنشىگىنە العان ادام مۇندا ءدال وسىنداي بەس كولشىك قازاتىنىن ايتىپتى. وندا بالىق شارۋاشىلىعىمەن اينالىسپاقشى. ال اۋماقتىڭ تاعى ءبىر شەتىندە تۇيەقۇس ءوسىرۋدى جوسپارلاپ قويىپتى.
وتكەن بەيسەنبىدە سۋعا سەگىز جاسار ويىن بالاسى باتىپ كەتكەن. تەرەڭدىگى ەكى جارىم مەتر بولاتىن كولشىكتەن ونى تۇرعىندار ارەڭ الىپ شىققان.
"تەرەڭدىگى ەكى جارىم مەتردەي. سول سۋدىڭ استىنان بالانى الىپ شىقتى. بۇل جەردە ەندى بالا بولعاننان كەيىن، وينايدى دا", – دەيدى ۇلان اۋىلىنىڭ تۇرعىنى بەيبىت شاڭتيمەسوۆ.
اۋماقتا كاسىبىن دوڭگەلەتىپ، پايداعا كەنەلمەك بولعان ادامعا قايعىلى جاعداي دا توسقاۋىل بولماي تۇر. ول سايداعى اتا-بابالاردىڭ ەسكى زيراتىن دا پىسقىرماعان. ەندى قازىلعان شۇڭقىرلاردان ادام سۇيەكتەرى شىعىپ جاتىر.
"ول كىسى ءبىرىنشى قازعان جەردەن ادام سۇيەگى شىققاننان كەيىن، تاستاي سالعان. ءتىپتى، قايتا كومبەگەن دە", – دەيدى اۋىل تۇرعىنى تولەۋحان ءابىلحانوۆ.
كاسىپكەر جازدا باقشا سۋاراتىن سۋىمىزعا دا زيانىن تيگىزىپ وتىر دەيدى جۇرت. سوندىقتان، بۇل جەردى حالىق يگىلىگىنە قايتارۋدى سۇرايدى.
بەلگىلى بولعانداي، تالاسقا تۇسكەن جەر جەكەنىڭ قولىنا 2006 جىلى بەرىلگەن. ال قازىرگى يەسى ونى 2014 جىلى ءوز قىزىنان ساتىپ العان. قازىر جەر تەلىمىنە قاتىستى مۇراعاتتاعى قۇجاتتار كوتەرىلىپ، ءمان-جاي انىقتالىپ جاتىر دەيدى جاۋاپتىلار.
ء"بىز قاراساي اۋدانىنىڭ اتىنان جەردى قاداعالاۋ-باقىلاۋ باسقارماسىنا، ءوز تاراپتارىنان ءتيىستى زاڭعا سايكەس ءىس-شارا جاساۋىنا حات جولدادىق. بۇل جەرگە ەشقانداي كول جاساۋعا بولمايدى. الدىمەن رۇقسات قاعازىن الۋ كەرەك. ول كىسىدە رۇقسات جوق. ول كىسىنىڭ اتىنا 10 كۇن ىشىندە جەردە قالپىنا كەلتىرەمىن دەپ اكت جاسالدى", – دەيدى قاراساي اۋدانى جەردىڭ پايدالانىلۋى مەن قورعالۋىن باقىلاۋ باسقارماسىنىڭ باس ينسپەكتورى كەنجەمۇرات قاسەنوۆ.
