Almaty oblysynda kásipker bútin bir aýylda bilgenin istep júr. Talaıdan beri mal jaıyp kelgen aýmaqty menshigine alǵan ol molany da qazyp tastaǵan deıdi Ulan aýylynyń turǵyndary. Endi sol shuńqyrlardan adam súıekteri shyǵyp jatyr, dep habarlaıdy KTK arnasy.
KTK arnasynyń habarlaýynsha, sharýa qojalyǵyma qajet dep qazyp tastaǵan kólshikterdiń birine ótken aptada bir bala batyp ketken. Eń soraqysy, onyń qoldan toǵan jasaýyna esh ruqsaty da bolmaǵan.
Ulan aýylynyń qaq ortasyndaǵy saıda jurt talaıdan beri malyn jaıyp keledi. Balalar da osynda oınaıdy. Aýyl turǵyndary Naýryz merekesin de osy jerde ótkizip kelgen eken. Endi aýmaqtyń ıesi paıda bolyp, budan bylaı munda eshkimdi kirgizbeıtinin málimdepti.
Jeke kásipker 24 gektardan astam jerdi jeti jyl buryn satyp alǵan eken. Al byltyr kúzde mundaǵy jerdi qazyp jasandy kólshik jasaǵan. At shaptyrym jerdi menshigine alǵan adam munda dál osyndaı bes kólshik qazatynyn aıtypty. Onda balyq sharýashylyǵymen aınalyspaqshy. Al aýmaqtyń taǵy bir shetinde túıequs ósirýdi josparlap qoıypty.
Ótken beısenbide sýǵa segiz jasar oıyn balasy batyp ketken. Tereńdigi eki jarym metr bolatyn kólshikten ony turǵyndar áreń alyp shyqqan.
"Tereńdigi eki jarym metrdeı. Sol sýdyń astynan balany alyp shyqty. Bul jerde endi bala bolǵannan keıin, oınaıdy da", – deıdi Ulan aýylynyń turǵyny Beıbit Shańtımesov.
Aýmaqta kásibin dóńgeletip, paıdaǵa kenelmek bolǵan adamǵa qaıǵyly jaǵdaı da tosqaýyl bolmaı tur. Ol saıdaǵy ata-babalardyń eski zıratyn da pysqyrmaǵan. Endi qazylǵan shuńqyrlardan adam súıekteri shyǵyp jatyr.
"Ol kisi birinshi qazǵan jerden adam súıegi shyqqannan keıin, tastaı salǵan. Tipti, qaıta kómbegen de", – deıdi aýyl turǵyny Tóleýhan Ábilhanov.
Kásipker jazda baqsha sýaratyn sýymyzǵa da zııanyn tıgizip otyr deıdi jurt. Sondyqtan, bul jerdi halyq ıgiligine qaıtarýdy suraıdy.
Belgili bolǵandaı, talasqa túsken jer jekeniń qolyna 2006 jyly berilgen. Al qazirgi ıesi ony 2014 jyly óz qyzynan satyp alǵan. Qazir jer telimine qatysty muraǵattaǵy qujattar kóterilip, mán-jaı anyqtalyp jatyr deıdi jaýaptylar.
"Biz Qarasaı aýdanynyń atynan jerdi qadaǵalaý-baqylaý basqarmasyna, óz taraptarynan tıisti zańǵa sáıkes is-shara jasaýyna hat joldadyq. Bul jerge eshqandaı kól jasaýǵa bolmaıdy. Aldymen ruqsat qaǵazyn alý kerek. Ol kiside ruqsat joq. Ol kisiniń atyna 10 kún ishinde jerde qalpyna keltiremin dep akt jasaldy", – deıdi Qarasaı aýdany jerdiń paıdalanylýy men qorǵalýyn baqylaý basqarmasynyń bas ınspektory Kenjemurat Qasenov.
