پاۆلودار وبلىسىندا اپپاراتتىق كەڭەستە ءوڭىردىڭ ءۇش باسقارماسىنىڭ باسشىسى وبلىس اكىمى ابىلقايىر سقاقوۆتان تارتىپتىك جازا الدى، دەپ حابارلادى ءوڭىر باسشىسىنىڭ ءباسپاسوز قىزمەتى.
مادەنيەت، مۇراعات ءىسى جانە قۇجاتتاما باسقارماسىنىڭ باسشىسى سامال بەگالينوۆا ونوماستيكا كوميسسياسىنىڭ قىزمەتىن جانە ونوماستيكا ماسەلەلەرىن تيىسىنشە حابارلاماعانى ءۇشىن سوگىس الدى. ءوڭىر باسشىسى وسى باعىتتا جۇمىستى رەتكە كەلتىرۋدى تالاپ ەتتى.
بۇعان دەيىن 29 ناۋرىزدا پاۆلودارداعى كوشە اتاۋلارىنىڭ اۋىسۋىن تالقىلاۋ بويىنشا قوعامدىق تىڭداۋ جوسپارلانعان بولاتىن. الايدا 27 ناۋرىزدا ول كەيىنگە قالدىرىلدى. پاۆلودار اكىمى ءباسپاسوز قىزمەتىنىڭ حابارلاۋىنشا، تىڭداۋ "اتاۋى وزگەرتىلەتىن كوشە ءتىزىمىن قايتا قاراۋعا بايلانىستى كەيىنگە اۋىستىرىلدى".
الەۋمەتتىك جەلىدە تاراعان تىزىمدە 30 كوشە بولدى، ولاردىڭ باسىم بولىگى قوعام جانە مەملەكەت قايراتكەرلەرىنىڭ ەسىمىن الۋعا ءتيىس ەكەنى كورسەتىلدى.
ەندى پاۆلودارداعى كوشەلەردىڭ اتاۋىن وزگەرتۋ بويىنشا قوعامدىق تىڭداۋلار 3 ساۋىرگە جوسپارلانىپ وتىر. بىراق رەسمي ءتىزىم ءالى جاريالانعان جوق.
سونداي-اق، اپپاراتتىق كەڭەس بارىسىندا ابىلقايىر سقاقوۆ "پاۆلودار" الەۋمەتتىك-كاسىپكەرلىك كورپوراتسياسىنىڭ باسشىسى مەيرام وتەشوۆ پەن جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مارات زەنوۆقا تارتىپتىك جازا قولدانعانىن مالىمدەدى. ءبىرىنشىسى – "دوستىق" شاعىن اۋدانىندا ەكى ءۇي قۇرىلىسىنىڭ ساپاسىن باقىلاماعان، ەكىنشىسى – جول جانە كولىك ينفراقۇرىلىمىن كۇتىپ ۇستاۋ جانە جولاۋشىلار تاسىمالى ساپاسى بويىنشا ءتيىستى جۇمىس ىستەمەگەن.
