Pavlodar oblysynda apparattyq keńeste óńirdiń úsh basqarmasynyń basshysy oblys ákimi Ábilqaıyr Sqaqovtan tártiptik jaza aldy, dep habarlady óńir basshysynyń baspasóz qyzmeti.
Mádenıet, muraǵat isi jáne qujattama basqarmasynyń basshysy Samal Begalınova onomastıka komıssııasynyń qyzmetin jáne onomastıka máselelerin tıisinshe habarlamaǵany úshin sógis aldy. Óńir basshysy osy baǵytta jumysty retke keltirýdi talap etti.
Buǵan deıin 29 naýryzda Pavlodardaǵy kóshe ataýlarynyń aýysýyn talqylaý boıynsha qoǵamdyq tyńdaý josparlanǵan bolatyn. Alaıda 27 naýryzda ol keıinge qaldyryldy. Pavlodar ákimi baspasóz qyzmetiniń habarlaýynsha, tyńdaý "ataýy ózgertiletin kóshe tizimin qaıta qaraýǵa baılanysty keıinge aýystyryldy".
Áleýmettik jelide taraǵan tizimde 30 kóshe boldy, olardyń basym bóligi qoǵam jáne memleket qaıratkerleriniń esimin alýǵa tıis ekeni kórsetildi.
Endi Pavlodardaǵy kóshelerdiń ataýyn ózgertý boıynsha qoǵamdyq tyńdaýlar 3 sáýirge josparlanyp otyr. Biraq resmı tizim áli jarııalanǵan joq.
Sondaı-aq, apparattyq keńes barysynda Ábilqaıyr Sqaqov "Pavlodar" áleýmettik-kásipkerlik korporaııasynyń basshysy Meıram Óteshov pen jolaýshylar kóligi jáne avtomobıl joldary basqarmasynyń basshysy Marat Zenovqa tártiptik jaza qoldanǵanyn málimdedi. Birinshisi – "Dostyq" shaǵyn aýdanynda eki úı qurylysynyń sapasyn baqylamaǵan, ekinshisi – jol jáne kólik ınfraqurylymyn kútip ustaý jáne jolaýshylar tasymaly sapasy boıynsha tıisti jumys istemegen.
