پرەزيدەنت جارلىعىمەن 25 مۇعالىم ءبىلىم بەرۋ سالاسىنا سىڭىرگەن ەڭبەگى ءۇشىن مەملەكەتتىك ماراپاتقا يە بولدى، دەپ حابارلايدى مينيسترلىكتىڭ رەسمي سايتى.
"الاشوردانىڭ تۇلعالارى مۇعالىمدى تورگە وتىرعىزساق دەگەن ەدى. سول يدەيا بۇگىنگى تاڭدا ىسكە استى. قازىر ءبىز توردە وتىرمىز. مۇعالىمدەردى قوعام دا مويىندادى. اتا-انا دا، وقۋشى دا مۇعالىمسىز ءتالىم-تاربيە الا المايتىنىن ءتۇسىندى. ۇستاز وسى اتاققا لايىق بولۋ كەرەك. ول ءۇشىن مۇعالىمنىڭ ءجۇرىس-تۇرىسى دا، كيگەن كيىمى دە، سويلەگەن ءسوزى دە ونەگە تۇتارلىقتاي بولۋ كەرەك. مۇعالىم سونداي دارەجەگە جەتسە عانا وقۋشىلاردىڭ جۇرەگىنەن ورىن الادى", – دەيدى ەڭبەك ارداگەرى، ۇلاعاتتى ۇستاز ورىنشا قارابالينا
مەملەكەتتىك ماراپات العانداردىڭ قاتارىندا الماتى وبلىسى № 1 مەكتەپ-گيمنازياسىنىڭ حيميا جانە بيولوگيا ءپانىنىڭ مۇعالىمى تاتيانا ستانكەۆيچ تا بار. ونىڭ ەڭبەك ءوتىلى - 35 جىل. ۇستاز شاكىرتتەرىنە ەكولوگيالىق مادەنيەتتى ۇيرەتىپ، جاس ەرىكتىلەردى تاربيەلەپ شىعارعان. ال 2013 جىلى "ۇزدىك پەداگوگ" اتانعان.
"بۇگىن ۇستازدار ءۇشىن ايتۋلى كۇن. بۇل ەلىمىزدەگى مۇعالىمدەردىڭ اتقارعان جۇمىسىنا بەرىلگەن جوعارى باعا. وقۋشىنىڭ قولىنا العاش رەت قالام ۇستاتىپ، ءارىپ تانىتقان، ءبىلىم بەرگەن مۇعالىمدەردىڭ زور ەڭبەگىنە كورسەتىلگەن قۇرمەت ءۇشىن العىسىم شەكسىز", – دەيدى ستانكەۆيچ.
ناگرادانى ءبىلىم جانە عىلىم ءمينيسترى اسحات ايماعامبەتوۆ تابىستادى. ونىڭ ايتۋىنشا، "قازاقستاننىڭ ەڭبەك سىڭىرگەن ۇستازى" اتاعىنا يە بولعان پەداگوگ 1 000 ايلىق ەسەپتىك كورسەتكىش مولشەرىندە بىرجولعى تولەم الادى.
"پەداگوگتەرگە مەملەكەت تاراپىنان ەرەكشە كوڭىل ءبولىنىپ جاتىر. مەملەكەت باسشىسىنىڭ تاپسىرماسى بويىنشا العاش رەت "قازاقستاننىڭ ەڭبەك سىڭىرگەن ۇستازى" مەملەكەتتىك ناگراداسى تاعايىندالدى. ەڭبەكتەرىڭىز بەن وسكەلەڭ ۇرپاقتى تاربيەلەۋگە قوسقان ۇلەستەرىڭىز ءۇشىن العىس ايتامىن. ناگرادالارىڭىز قۇتتى بولسىن!", – دەدى مينيستر اسحات ايماعامبەتوۆ.
