Prezıdent jarlyǵymen 25 muǵalim bilim berý salasyna sińirgen eńbegi úshin memlekettik marapatqa ıe boldy, dep habarlaıdy mınıstrliktiń resmı saıty.
"Alashordanyń tulǵalary muǵalimdi tórge otyrǵyzsaq degen edi. Sol ıdeıa búgingi tańda iske asty. Qazir biz tórde otyrmyz. Muǵalimderdi qoǵam da moıyndady. Ata-ana da, oqýshy da muǵalimsiz tálim-tárbıe ala almaıtynyn túsindi. Ustaz osy ataqqa laıyq bolý kerek. Ol úshin muǵalimniń júris-turysy da, kıgen kıimi de, sóılegen sózi de ónege tutarlyqtaı bolý kerek. Muǵalim sondaı dárejege jetse ǵana oqýshylardyń júreginen oryn alady", – deıdi eńbek ardageri, ulaǵatty ustaz Orynsha Qarabalına
Memlekettik marapat alǵandardyń qatarynda Almaty oblysy № 1 mektep-gımnazııasynyń hımııa jáne bıologııa pániniń muǵalimi Tatıana Stankevıch ta bar. Onyń eńbek ótili - 35 jyl. Ustaz shákirtterine ekologııalyq mádenıetti úıretip, jas eriktilerdi tárbıelep shyǵarǵan. Al 2013 jyly "Úzdik pedagog" atanǵan.
"Búgin ustazdar úshin aıtýly kún. Bul elimizdegi muǵalimderdiń atqarǵan jumysyna berilgen joǵary baǵa. Oqýshynyń qolyna alǵash ret qalam ustatyp, árip tanytqan, bilim bergen muǵalimderdiń zor eńbegine kórsetilgen qurmet úshin alǵysym sheksiz", – deıdi Stankevıch.
Nagradany bilim jáne ǵylym mınıstri Ashat Aımaǵambetov tabystady. Onyń aıtýynsha, "Qazaqstannyń eńbek sińirgen ustazy" ataǵyna ıe bolǵan pedagog 1 000 aılyq eseptik kórsetkish mólsherinde birjolǵy tólem alady.
"Pedagogterge memleket tarapynan erekshe kóńil bólinip jatyr. Memleket basshysynyń tapsyrmasy boıynsha alǵash ret "Qazaqstannyń eńbek sińirgen ustazy" memlekettik nagradasy taǵaıyndaldy. Eńbekterińiz ben óskeleń urpaqty tárbıeleýge qosqan úlesterińiz úshin alǵys aıtamyn. Nagradalaryńyz qutty bolsyn!", – dedi Mınıstr Ashat Aımaǵambetov.
