Qazaqstandyq ata-analar dabyl qaǵa bastady

7564
Adyrna.kz Telegram

Elimizdegi koronavırýsqa qatysty ahýaldyń kún sanap nasharlanyp bara jatqany jurtty alańdata bastady. Birneshe qalamyz qyzyl aımaqqa endi. Bul týraly resmı bılik ókilderi de málimdedi. Soǵan qaramastan Qazaqstandaǵy keıbir mektepterde oqýshylar baryp-kelip bilim alýda.

Balasynyń sabaq oqýy úshin mektepke baryp kelýi kez kelgen ata-ana úshin úreıge aınala bastady. Óıtkeni dál qazirgi kezde balalar arasynda da koronavırýsten bólek basqa da juqpaly aýrýlardyń tarap, órshıtin kezeńi. Áleýmettik jelilerde de saqtyq sharalary úshin oqýshylar qashyqtyqtan bilim alsyn dep talap qoıyp jatqandar jeterlik. Máselen, Facebook-taǵy «Qazaqstan ustazdary» tobynda:
«Epıdemıologııalyq jaǵdaıdy eskerip mekteptegi oqýdy onlaınǵa kóshirgen durys dep oılaımyn. Bul - barlyǵymyzdyń qaýipsizdigimiz úshin mańyzdy. Osy jerde dabyl qaǵyp, máseleni kóterip otyrǵan ata-analar men muǵalimderdi qoldaımyn. Adam ómiri men densaýlyǵy bárinen qymbat!» degen jazbaǵa qatysty jurtshylyq qoldaý pikirin jazysýda.

«Kovıd pe, basqa ma, bilmeımin, taıaýda ǵana 4 jasar ulym taban astynda qyzýy kóterilip, mazasy qashty. Álginde ǵana oınap otyrǵan ulymnyń qyzýy túspeı, denesin qyzyl túıirshik bórtpeler basty. Shuǵyl dárigerge qarattyq. Sol kezde dárigerimiz 10 jasqa deıingi balalar arasynda osyndaı juqpaly vırýs qatty júrip jatqanyn aıtty. Aıtsa, aıtqanyndaı, kelesi kúni 9 jasar qyzyma jabysty álgi aýrý. Biz ábigerge túsip jatqanda, aýyldaǵy kelinim de 2 jasar jáne 8 aılyq balalarynyń osyndaı aýrýmen aýyryp bastaǵanyn aıtty. Demek, mynadaı shaqta balany mektepke jiberip, abyroı tappaıtynymyz anyq. Sońǵy toqsandy qashyqtyqtan oqyta salǵanymyz durys»,- deıdi shymkenttik ata-ana Tolqynaı Baqytbekqyzy.

Osyǵan deıin de negizgi toqsandardy qashyqtyqtan oqytqan Qazaqstan mektepterin sońǵy 4-shi toqsanda ashýdyń mańyzy qanshalyqty salmaqty? Eki aıǵa jeter-jetpes ýaqytta mektepke baryp bilim alady degen balalarymyzdyń densaýlyǵyna qaýip tónse, ne bolmaq? Álde bul suraqqa qatysty halyq densaýlyǵyna jaýapty ókilderdiń naqty aıtary bar ma eken?

Muqash MURATULY,

"Adyrna" ulttyq portaly.

Pikirler