قازاقستاننىڭ ەڭبەك سىڭىرگەن ۇستازدارىنا 2 917 000 تەڭگەدەن بەرىلدى

13934
Adyrna.kz Telegram

ەلىمىزدە العاش رەت پەداگوگتەرگە «قازاقستاننىڭ ەڭبەك سىڭىرگەن ۇستازى» مەملەكەتتىك ناگراداسى بەرىلدى. مەملەكەت باسشىسىنىڭ جارلىعىمەن 20-دان استام مۇعالىم ءبىلىم بەرۋ سالاسىنا سىڭىرگەن ەڭبەگى ءۇشىن مەملەكەتتىك ماراپاتقا يە بولدى، دەپ حابارلايدى «ادىرنا» ءتىلشىسى بعم ءباسپاسوز قىزمەتىنە سىلتەمە جاساپ.

ءبىلىم جانە عىلىم ءمينيسترى اسحات ايماعامبەتوۆ پەداگوگتەرگە مەملەكەتتىك ناگرادانى تابىس ەتىپ، ولارعا العىس ءبىلدىردى.

«پەداگوگتەرگە مەملەكەت تاراپىنان ەرەكشە كوڭىل ءبولىنىپ جاتىر. مەملەكەت باسشىسىنىڭ تاپسىرماسى بويىنشا العاش رەت "قازاقستاننىڭ ەڭبەك سىڭىرگەن ۇستازى" مەملەكەتتىك ناگراداسى تاعايىندالدى. ەڭبەكتەرىڭىز بەن وسكەلەڭ ۇرپاقتى تاربيەلەۋگە قوسقان ۇلەستەرىڭىز ءۇشىن العىس ايتامىن. ناگرادالارىڭىز قۇتتى بولسىن! سىزدەرگە مىقتى دەنساۋلىق، وتباسىلارىڭىزعا اماندىق، باق-بەرەكە تىلەيمىن»، – دەدى مينيستر اسحات ايماعامبەتوۆ.

سونداي-اق ءبىلىم جانە عىلىم ءمينيسترى سوڭعى جىلدارى ەنگىزىلگەن وڭ وزگەرىستەرگە توقتالىپ ءوتتى. ماسەلەن، جالاقىنىڭ ءوسۋى، ەسەپتىلىك پەن پەداگوگيكالىق جۇكتەمەنىڭ تومەندەۋى، وقۋلىقتار مەن وقۋ باعدارلامالارىن ازىرلەۋگە قويىلاتىن تالاپتاردىڭ كۇشەيۋى، مەكتەپ ديرەكتورلارىن تاعايىنداۋ جانە پەداگوگتەردى جۇمىسقا قابىلداۋ قاعيدالارىنىڭ وزگەرۋى، پەداگوگ ماماندىعى بويىنشا وقۋعا تۇسۋگە قاجەت شەكتى ۇپايدىڭ ارتۋى، بولاشاق مۇعالىمدەردىڭ اي سايىنعى ستيپەندياسىنىڭ جوعارىلاۋى تۋرالى دا ايتىلدى.

ايتا كەتەيىك، «قازاقستاننىڭ ەڭبەك سىڭىرگەن ۇستازى» مەملەكەتتىك ناگراداسى مۇعالىمدەرگە ۇزدىك جەتىستىكتەرى مەن مەملەكەت الدىنداعى ەرەكشە ەڭبەگى ءۇشىن بەرىلەدى. جوعارى اتاققا يە بولعان پەداگوگ 1 000 اەك مولشەرىندە بىرجولعى تولەم الادى.

«ادىرنا» ۇلتتىق پورتالى

پىكىرلەر