Elimizde alǵash ret pedagogterge «Qazaqstannyń eńbek sińirgen ustazy» memlekettik nagradasy berildi. Memleket basshysynyń Jarlyǵymen 20-dan astam muǵalim bilim berý salasyna sińirgen eńbegi úshin memlekettik marapatqa ıe boldy, dep habarlaıdy «Adyrna» tilshisi BǴM baspasóz qyzmetine silteme jasap.
Bilim jáne ǵylym mınıstri Ashat Aımaǵambetov pedagogterge memlekettik nagradany tabys etip, olarǵa alǵys bildirdi.
«Pedagogterge memleket tarapynan erekshe kóńil bólinip jatyr. Memleket basshysynyń tapsyrmasy boıynsha alǵash ret "Qazaqstannyń eńbek sińirgen ustazy" memlekettik nagradasy taǵaıyndaldy. Eńbekterińiz ben óskeleń urpaqty tárbıeleýge qosqan úlesterińiz úshin alǵys aıtamyn. Nagradalaryńyz qutty bolsyn! Sizderge myqty densaýlyq, otbasylaryńyzǵa amandyq, baq-bereke tileımin», – dedi Mınıstr Ashat Aımaǵambetov.
Sondaı-aq Bilim jáne ǵylym mınıstri sońǵy jyldary engizilgen oń ózgeristerge toqtalyp ótti. Máselen, jalaqynyń ósýi, eseptilik pen pedagogıkalyq júktemeniń tómendeýi, oqýlyqtar men oqý baǵdarlamalaryn ázirleýge qoıylatyn talaptardyń kúsheıýi, mektep dırektorlaryn taǵaıyndaý jáne pedagogterdi jumysqa qabyldaý qaǵıdalarynyń ózgerýi, pedagog mamandyǵy boıynsha oqýǵa túsýge qajet shekti upaıdyń artýy, bolashaq muǵalimderdiń aı saıynǵy stıpendııasynyń joǵarylaýy týraly da aıtyldy.
Aıta keteıik, «Qazaqstannyń eńbek sińirgen ustazy» memlekettik nagradasy muǵalimderge úzdik jetistikteri men memleket aldyndaǵy erekshe eńbegi úshin beriledi. Joǵary ataqqa ıe bolǵan pedagog 1 000 AEK mólsherinde birjolǵy tólem alady.
«Adyrna» ulttyq portaly
