«سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى باسقارماسىنىڭ توراعاسى احمەتجان ەسىموۆ قىزمەتىنەن بوساتىلدى، دەپ حابارلايدى «ادىرنا» ءتىلشىسى.
نۇرسۇلتان نازارباەۆ ا.ەسىموۆتىڭ باسشىلىعىمەن «سامۇرىق-قازىنا» ۇلتتىق ءال-اۋقات قورى دامۋدىڭ جاڭا ساپالىق دەڭگەيىنە كوتەرىلىپ، بۇۇ ەسەبىندە الدىڭعى قاتارلى حالىقارالىق ۇزدىك جيىرما قوردىڭ قاتارىنا قوسىلعانىن اتاپ ءوتتى. بۇل تۋرالى ەلباسىنىڭ رەسمي سايتى جازدى.
ۇلتتىق ءال-اۋقات قورىن باسقارۋ جونىندەگى كەڭەستىڭ توراعاسى بۇل ناتيجە نەگىزىنەن ا.ەسىموۆتىڭ جوعارى جاۋاپكەرشىلىگى مەن زور كاسىبي تاجىريبەسىنىڭ ارقاسىندا مۇمكىن بولعانىن ايتتى.
سونداي-اق ا.ەسىموۆتىڭ باسقا دا ماڭىزدى مەملەكەتتىك لاۋازىمداردا جۇكتەلگەن مىندەتتەردى بارىنشا ءتيىمدى ورىنداعانىنا توقتالدى.
ءوز كەزەگىندە ا.ەسىموۆ وزىنە ارتىلعان جوعارى سەنىمى ءۇشىن ەلباسىعا العىس ايتتى. ول قوردىڭ جەتكەن جەتىستىكتەرى تۇڭعىش پرەزيدەنتتىڭ حالىقتىڭ تۇرمىسىن جاقسارتۋ جانە مەملەكەتىمىزدى گۇلدەندىرۋ باعىتىندا جۇرگىزگەن ساياساتىنىڭ ارقاسىندا ەلىمىز قول جەتكىزگەن تولاعاي تابىستىڭ شاعىن ءبىر بولىگى عانا ەكەنىن اتاپ ءوتتى.
«ادىرنا» ۇلتتىق پورتالى
