ءىرى قالالاردا كوروناۆيرۋستىڭ ءۇشىنشى تولقىنى باستالىپ جاتىر. بۇل تۋرالى تىكەلەي ەفير بارىسىندا قالا اكىمى باقىتجان ساعىنتاەۆ ايتتى.
"جازبەن سالىستىرار بولساق، تاۋلىگىنە ەكى ەسە كوپ جاعداي تىركەلۋدە. بۇل كوروناۆيرۋستىڭ جاڭا شتاممدارىمەن بايلانىستى. الماتى قازىر قيىن جاعدايدى وتكەرىپ جاتىر", - دەدى ساعىنتاەۆ.
زەرتتەۋ بارىسىندا بريتاندىق جانە وڭتۇستىكافريكالىق شتاممدارعا ۇقساس مۋتاتسيالار انىقتالدى.
قالادا بارلىعى 7 011 ورىن بار. ولار ناۋقاستاردىڭ جاعدايىنا بايلانىستى ۇشكە بولىنگەن: اۋىر، ورتاشا جانە جەڭىل ءتۇرى. قازىرگى ۋاقىتتا بەس مىڭ توسەك-ورىننىڭ 48 پروتسەنتى بوس تۇر. ينفەكتسيالىق اۋرۋحانالاردا 1080 ورىن بار، ونىڭ 75 پروتسەنتى بوس ەمەس.
قالا باسشىنىڭ سوزىنشە، قالانى تۇگەلدەي جابۋ تۋرالى ماسەلە قاراستىرىلماعان.
"قالانى جاپپايمىز. مۇنداي ماسەلە كۇن تارتىبىندە تۇرعان جوق. قابىلدانعان شارالار جاعدايدى تۇراقتاندىرۋعا مۇمكىندىك بەرەدى دەپ ويلايمىز", - دەدى قالا باسشىسى تىكەلەي ەفيردە.
الدا بولاتىن بارلىق وزگەرىستەر، شەكتەۋلەر ۆيرۋس قارقىنىنا بايلانىستى بولاتىنىن دا اتاپ ءوتتى.
"20 ناۋرىزدان باستاپ شەكتەۋ ەنگىزىلدى. ەپيدەميولوگيالىق جاعدايعا بايلانىستى تاعى ەكى اپتاعا سوزۋ تۋرالى شەشىم قابىلدادىق. بۇگىن كاسىپكەرلەرمەن كەزدەستىك، 1,5 ساعات بويى شارالاردى تالقىلادىق. بيزنەس تاراپىنان تۇسىنىستىك بار. ەندى قالالىق بيۋدجەتتى ەسكەرە وتىرا، كاسىپكەرلەرگە قولداۋ كورسەتۋ شارالارىن ويلاستىراتىن بولامىز. الداعى اپتانىڭ سوڭىندا باس قوسامىز. ەگەر جاعداي تۇراقتالسا، شەكتەۋ شارالارىن قايتا قاراستىراتىن بولامىز", - دەدى ساعىنتاەۆ.
