دەپۋتات شىعىس قازاقستان وبلىسىنىڭ تارباعاتاي اۋدانىنداعى اۋىلعا نازارباەۆتىڭ ەسىمىن بەرۋدى ۇسىندى، دەپ حابارلايدى Altaynews.
تارباعاتاي اۋداندىق ءماسليحاتىنىڭ دەپۋتاتى قايرات داكەروۆ قازاقستان پرەزيدەنتى قاسىم-جومارت توقاەۆقا، پرەمەر-مينيستر اسقار مامينگە، ءماجىلىس توراعاسى نۇرلان نىعماتۋلينگە، شقو اكىمى دانيال احمەتوۆكە جانە تۇرعىندار نازارىنا اشىق حات جولدادى.
21 ناۋرىزدا جازىلعان ۇندەۋدە اۆتور ەل تاۋەلسىزدىگىنىڭ 30 جىلدىعى قارساڭىندا اقجار اۋىلىنا نۇرسۇلتان نازارباەۆتىڭ ەسىمىن بەرىپ، اۋىلعا اۋدان ورتالىعى ستاتۋسىن قايتارۋ تۋرالى جازادى.
"تاۋەلسىزدىگىمىزدىڭ 30 جىلدىعى قارساڭىندا ەلباسىمىز نۇرسۇلتان نازارباەۆتىڭ ەڭبەگىن كەلەشەك ۇرپاققا ماڭگىلىك ەتۋ ماقساتىندا 1997 جىلعا دەيىن شەكارادا جاتقان بۇرىنعى تارباعاتاي اۋدانى ورتالىعى بولعان اقجار اۋىلىنا اۋدان ورتالىعى ستاتۋسىن قايتارىپ، قازىرگى تارباعاتاي اۋدانى اقسۋات اۋىلىنان اقجار ايماعىن ءبولىپ، بۇرىنعىشا ەكى اۋدان رەتىندە قالپىنا كەلتىرىپ، ەلباسىمىزدىڭ اتىنا بەرسە دەگەن ۇسىنىس بار", - دەيدى تارباعاتاي اۋداندىق ءماسليحاتىنىڭ دەپۋتاتى قايرات داكەروۆ.
سونداي-اق اۆتور تارباعاتاي اۋدانى حالقىنىڭ ەلباسىنىڭ ەڭبەگىن جوعارى باعالايتىنىن ايتىپ وتكەن.
"اۋدانىمىز قىتاي حالىق رەسپۋبليكاسىمەن شەكارادا ورنالاسقان، ەلباسىمىزدىڭ كورەگەن، سارابدال ساياساتىنىڭ ارقاسىندا، جەكە بەدەلىنىڭ ناتيجەسىندە كورشىلەس رەسەي، قىتاي، وزبەكستان، قىرعىزستان ەلدەرىمەن شەكارامىز دەلليميتاتسيا جاسالىپ، دەموركاتسيالاندى", - دەپ تولىقتىردى دەپۋتات.
دەپۋتاتتىڭ بۇل باستاماسىن قوعام بەلسەندىسى، اۋداننىڭ تۋماسى ەرمەك قۇرمانعالي دا قوستاپ وتىر. بۇل تۋرالى ويىن بەلسەندى ءوزىنىڭ الەۋمەتتىك جەلىدەگى پاراقشاسىندا جازدى.
"ەلباسىنىڭ قىتايمەن شەكارانى شەگەندەپ بەرگەن ەڭبەگىنىڭ قۇرمەتىنە ءبىر اۋداندى ەلباسىنىڭ اتىمەن اتاعاندا تۇرعان ەشتەڭە جوق. 1997 جىلى اقسۋات اۋدانىنا قوسىلىپ كەتكەن تارباعاتاي اۋدانىن جەكە اۋدان رەتىندە قايتارىپ، ورتالىعىن قايتادان اقجار اۋىلى ەتۋ كەرەك. جاڭادان قۇرىلعان اۋدانعا تاۋەلسىزدىگىمىزدىڭ 30 جىلدىعى مەرەيتويى قارساڭىندا ەلباسىمىز نۇرسۇلتان ءابىشۇلى نازارباەۆتىڭ اتىن بەرىپ، اقجار اۋىلىنا ەلباسىنىڭ ءبىر ەڭسەلى ەسكەرتكىشىن ورناتۋ كەرەك", - دەيدى قوعام بەلسەندىسى.
سونداي-اق اۋىلدىڭ ورتاسىنداعى جامبىل كوشەسىن نازارباەۆ كوشەسىنە اۋىستىرۋ ۇسىنىسىن دا جاسادى (تارباعاتايدا جامبىل اتامىزدىڭ اتىندا اۋىل دا، مەكتەپ تە بار). قوعام بەلسەندىسىنىڭ ويىنشا، بۇل وي ىسكە اسسا، تارباعاتاي حالقىنىڭ كوشى توقتاپ، جاڭا جۇمىس ورىندارى اشىلىپ، شەكارانىڭ شەتىنە حالىق ورنىعىپ، ورىسكە مال تولىپ، حالىق سانى كوبەيمەك.
