قۇتقارۋشىلار قارلى بورانمەن كۇرەسۋدە. «قازگيدرومەتتىڭ» مالىمەتىنشە، وسى جىلدىڭ 23 ناۋرىز كۇنى ساعات 21:00-دەن 24 ناۋرىز ساعات 21:00-گە دەيىن تۇندە بۇرقاسىن بولىپ، سولتۇستىك-باتىستان سوققان جەلدىڭ ەكپىنى 15-18 م/س جەتەدى، دەپ حابارلايدى قالا اكىمدىگىنىڭ رەسمي سايتى.
اۆاريالىق-قۇتقارۋ، كەزەك كۇتتىرمەيتىن جۇمىستارعا، پاترۋلدەۋگە قالانىڭ شۇعىل قىزمەتتەرىنىڭ جەكە قۇرامى، ونىڭ ىشىندە نۇر-سۇلتان قالاسى تجد، قر ءىىم، جاو، جول قىزمەتتەرى جۇمىلدىرىلدى. «رۋبەج» بەكەتتەرىندە اۆتوكولىكتەر جينالىپ قالدى: 135 جەڭىل كولىك، 29 جۇك اۆتوكولىگى، ونىڭ ىشىندە: ششۋچينسك قالاسى باعىتىندا - 40 جەڭىل، 10 جۇك ءاۆتوموبيلى; قاراعاندى قالاسى باعىتىندا - 15 جەڭىل، 7 جۇك اۆتوكولىگى; قورعالجىن كەنتى باعىتىندا - 30 جەڭىل، 5 جۇك ءاۆتوموبيلى; پاۆلودار قالاسى باعىتىندا - 50 جەڭىل، 7 جۇك اۆتوكولىگى تۇر.
ەلوردالىق قۇتقارۋشىلاردىڭ كۇشىمەن وسى ۋاقىتقا دەيىن 18 ادام، ونىڭ ىشىندە 2 بالا، سونداي-اق 5 بىرلىك تەحنيكا قۇتقارىلدى. قازىرگى ۋاقىتتا اۋا رايىنىڭ ناشارلاۋىنا بايلانىستى (قار، بوران، كوكتايعاق، كورىنۋدىڭ شەكتەلۋى) نۇر-سۇلتان قالاسىنان رەسپۋبليكالىق ماڭىزى بار اۆتوجولدار ۋچاسكەسىندە بارلىق اۆتوكولىك ءتۇرى ءۇشىن قوزعالىس جابىلدى.
«قۇرمەتتى ازاماتتار! نۇر-سۇلتان قالاسى تجد قالا سىرتىنا شىقپاۋعا، شۇعىل قىزمەتتەردىڭ ەسكەرتۋىنە قۇلاق اسۋعا، بالالاردى ەرەسەكتەردىڭ قاراۋىنسىز كوشەگە شىعارماۋعا كەڭەس بەرەدى; ۇيدە جىلىتۋ قۇرىلعىلارىن پايدالانباڭىز; جۇرگىزۋشىلەر جولدا قاۋىپسىز جىلدامدىقپەن ءجۇرۋى كەرەك، سونداي-اق قاۋىپتى مانەۆرلەردەن اۋلاق بولۋ كەرەك; جولداردىڭ اشىلۋى نەمەسە جابىلۋى تۋرالى اقپاراتتى ءبىزدىڭ «112-Nur-Sultan» تەلەگرامم ارناسىنا، سونداي-اق 112 تەلەفونى بويىنشا قاداعالاي الاسىز»، - دەلىنگەن تجد حابارلاماسىندا.
