Qutqarýshylar qarly boranmen kúresýde. «Qazgıdromettiń» málimetinshe, osy jyldyń 23 naýryz kúni saǵat 21:00-den 24 naýryz saǵat 21:00-ge deıin túnde burqasyn bolyp, soltústik-batystan soqqan jeldiń ekpini 15-18 m/s jetedi, dep habarlaıdy qala ákimdiginiń resmı saıty.
Avarııalyq-qutqarý, kezek kúttirmeıtin jumystarǵa, patrýldeýge qalanyń shuǵyl qyzmetteriniń jeke quramy, onyń ishinde Nur-Sultan qalasy TJD, QR IIM, JAO, jol qyzmetteri jumyldyryldy. «Rýbej» beketterinde avtokólikter jınalyp qaldy: 135 jeńil kólik, 29 júk avtokóligi, onyń ishinde: ýchınsk qalasy baǵytynda - 40 jeńil, 10 júk avtomobıli; Qaraǵandy qalasy baǵytynda - 15 jeńil, 7 júk avtokóligi; Qorǵaljyn kenti baǵytynda - 30 jeńil, 5 júk avtomobıli; Pavlodar qalasy baǵytynda - 50 jeńil, 7 júk avtokóligi tur.
Elordalyq qutqarýshylardyń kúshimen osy ýaqytqa deıin 18 adam, onyń ishinde 2 bala, sondaı-aq 5 birlik tehnıka qutqaryldy. Qazirgi ýaqytta aýa raıynyń nasharlaýyna baılanysty (qar, boran, kóktaıǵaq, kórinýdiń shektelýi) Nur-Sultan qalasynan respýblıkalyq mańyzy bar avtojoldar ýchaskesinde barlyq avtokólik túri úshin qozǵalys jabyldy.
«Qurmetti azamattar! Nur-Sultan qalasy TJD qala syrtyna shyqpaýǵa, shuǵyl qyzmetterdiń eskertýine qulaq asýǵa, balalardy eresekterdiń qaraýynsyz kóshege shyǵarmaýǵa keńes beredi; úıde jylytý qurylǵylaryn paıdalanbańyz; júrgizýshiler jolda qaýipsiz jyldamdyqpen júrýi kerek, sondaı-aq qaýipti manevrlerden aýlaq bolý kerek; joldardyń ashylýy nemese jabylýy týraly aqparatty bizdiń «112-Nur-Sultan» Telegramm arnasyna, sondaı-aq 112 telefony boıynsha qadaǵalaı alasyz», - delingen TJD habarlamasynda.
