پوليتسيا بىتكەن كارانتين تالاپتارىن بۇزعاندار مەن بلوك بەكەتتەردى قورىپ جۇرگەندە، ۇيدەگى قىلمىس كوبەيىپتى. بۇل تۋرالى ۇكىمەت ساعاتىندا ىشكى ىستەر ءمينيسترى ەرلان تۇرعىمباەۆ ايتتى، دەپ حابارلايدى “ادىرنا” ۇلتتىق پورتالى Stan.kz سىلتەمە جاساپ.
تۇرمىستىق زورلىق-زومبىلىق ساناتىنداعى قىلمىستاردىڭ 80 پايىزى ازاماتتاردىڭ ءوز ۇيلەرىندە بولعانىن ايتقان مينيستر، مۇنى ولاردىڭ سىرتقا شىعا الماي، ءتورت قابىرعاعا قامالىپ قالۋىمەن بايلانىستىردى.
بۇل تۋرالى «ءسوزدىڭ شىنى كەرەكتە» ايتىلدى.
پوليتسيا، «ەكەۋدىڭ اراسىنا ەسى كەتكەن تۇسەدى» دەمەسە دە، كارانتيننەن قولى بوسامادى دەلىك. بىراق «ايەلىمدى ءولتىردىم» دەگەن ادامدى قاماۋعا الماعانىنىڭ سالدارىنان قىزىمىزدىڭ ءمايىتىن تاپپاي ءجۇرمىز دەگەن وتباسى، قاراعاندىدا تەرگەۋ دە سوزىلىپ كەتتى دەپ نارازى.
شىمكەنتتە قايىنجۇرتىنا كەتكەن اپكەمنىڭ ءولى دەنەسىندە كوگەرگەن ىزدەر كوپ بولسا دا، دارىگەر كۇيەۋ بالا قاماۋدا ەمەس دەپ قۋانىشوۆتار وتباسى رەداكتسيامىزعا حابارلاستى. ال كۇيەۋىنىڭ سوققىسىنان مۇگەدەك بولىپ قالعان ايەلدەر ءوز قۇقىن نەگە قورعاي الماي ءجۇر؟
«ايەل ساباعىشتار الدىمەن ايەلىن ۇرىپ، كەيىن بالاسىنا قول كوتەرىپ، ودان كەيىن تۋعانىن زورلاۋعا كوشەدى» دەگەن قوعام بەلسەندىلەرى تاعى قانداي سۇمدىقتىڭ بەتىن اشتى؟ كۇيەۋىنىڭ توقال الامىن دەگەن تالابىنا كونبەگەن كەلىنشەكتىڭ ولىمىنە قاتىستى ءىس نەگە سوتقا جەتپەي جاتىر؟
جاركەنتتە، شىمكەنتتە الماتىدا اسىلىپ قايتىس بولعان ايەلدەردىڭ ولىمىنە كىم كىنالى؟
كۇيەۋى كۇدىتىگە اينالعان ايەلدەردى ۋاقىتىندا نەگە قورعاي المادىق؟ الدىمەن ايەلىن ۇرىپ، كەيىن بالاسىن ۇرعاندار تاعى قانداي قىلمىسقا بارعان؟
گۇلزار، سايرانگۇل، گۇلمايسا، وكتيابر. العاشقى ءۇش كەلىنشەك قىلمىستىق ءىس-ماتەريالىندا ءوز-وزىنە قول جۇمساپ قايتىس بولعان دەپ جازىلعانىمەن، تۋىستارى كۇيەۋلەرىنىڭ سوققىسىنان قايتىس بولعان دەپ جازدى. ال ءتورتىنشى كەلىنشەكتىڭ تۋىستارى كەلىنشەكتىڭ ءمايىتىن تابا الماي ءجۇرمىز دەگەن ەدى. ءالى دە تابىلماپتى.
گۇلزاردىڭ ارتىندا ءۇش بالاسى قالدى. ەڭ كەنجەسى 8 ايلىق. سايرانگۇلدىڭ ارتىندا 3 بالا. گۇلمايسانىڭ ءبىر بالاسى، وكتيابردىڭ ارتىندا 4 بالاسى قالدى.
ءتورت كەلىنشەكتىڭ جاقىندارى قىزدارىنىڭ ولىمىنە كۇيەۋ بالالارى كىنالى، پوليتسيا تەرگەۋدى شالا جۇرگىزدى دەيدى.
گۇلزاردىڭ تۋىستارى مايىتتە ايەلدىڭ قابىرعالارى سىنعانىن، كوزى كوگەرگەنىن، شۇيدە تۇسىنان ءتىرى كەزىندە سوققى العانى انىقتالدى دەپ وتىر. الايدا تەرگەۋ ءىستى سوتقا ءوز-وزىنە قول سالدى دەپ جەتكىزگەن.
"ماشينادان قان تابىلدى، ۇيىندەگى كيىمنەن قان تابىلدى. ەسىكتىڭ الدىنداعى توپىراقتان قان تابىلدى. وسىلاي انىق بولا تۇرا بۇل دالەل بولماي تۇر", - دەدى وكتيابردىڭ اناسى سايران بالبي.
قاراعاندى وبلىسىن توعىزقۇدىق اۋىلىندا پوليتسياعا ايەلىمدى ءولتىردىم دەپ مويىنداپ كەلگەن ەر ادام ونى قايدا كومگەنىن ايتامىن دەپ تە كەلىستى. الايدا ەرتەسى ءوز-وزىنە قول سالىپ قايتىس بولدى. ال وكتيابردىڭ دەنەسى سول كۇيى تابىلماي جاتىر.
سايرانگۇل لايىسقىزى كۇيەۋىمەن پاتەر جالداپ قايتىس بولعان 4 بالانىڭ اناسى. 2018 جىلى الماتىدا پوليتسيا ءوز-وزىنە قول جۇمسادى دەگەن كەلىنشەك كومادا جاتىپ، قايتىس بولدى.
سايرانگۇلدىڭ اعاسى قارىنداسى مەن كۇيەۋ بالانى اراسىندا توقال ءۇشىن ۇرىس بولعانىن ايتادى. الايدا كۇيەۋى ايەلىن ۇردىم دەپ مويىنداماپتى.
شىمكەنتتىك گۇلزار قۋانىشەۆانىڭ قازاسىنا دا تۋىستارى كۇيەۋىن كىنالايدى. اپكەسى قايىن جۇرتىنا كەتكەن كۇيى ورالماعان. ءسىڭلىسى ۇلبوسىن اپكەسىنىڭ ولىمىنە كۇيەۋ بالاسىن كىنالايدى. شىمكەنتتەگى ەمحانادا دارىگەر بولىپ جۇمىس ىستەيتىن جەزدەسىنىڭ قاتىسى بولۋى مۇمكىن دەگەن ۇلبوسىن ءىستىڭ قايتا قارالعانىن تالاپ ەتەدى. ايتۋىنشا، ءمايىتتى تەكسەرگەندە دەنەسى مەن بەتى كوگەرگەن، ءىسىپ كەتكەن ەكەن.
8 ناۋرىز كۇنى تاعى ءبىر كەلىنشەك كوگالا قويداي سوققىعا جىعىلدى. "ەكىنشى ايەلىڭ بولمايمىن" دەگەنى ءۇشىن كەزدەسىپ جۇرگەن ازاماتى سوققىنىڭ استىنا العان. ۇيىنە اكەتىپ، ايەلى مەن بالالارىنىڭ كوزىنشە سوققىعا جىققان. بۇل ءىستى پوليتسيا تۇرمىستىق زورلىق-زومبىلىق بابى بويىنشا قوزعادى.
وكتيابر ءبالبيدىڭ ىسىنە قاتىستى پوليتسيا جاڭا دەرەك جوق ەكەنىن ايتادى. سايرانگۇلدىڭ ىسىنە قاتىستى الماتى پوليتسياسى ءىستىڭ تەرگەۋ باسقارماسىنىڭ وندىرىسىندە ەكەنىن ايتتى.
ال گۇلمايسانىڭ جاقىندارى قىزدىڭ ولىمىنە قاتىستى الماتى وبلىستىق قىلمىستىق ىستەر جونىندەگى اپەللياتسيالىق القاعا ءۇمىت ارتىپ وتىر. ءولىمىنىڭ سەبەبىن ايتىپ، ارتىنان حات قالدىرىپ كەتكەن قىزدى جاقىندارى كۇيەۋ بالاسىنىڭ جازالانعانان تالاپ ەتتى.
شىمكەنتتىك گۇلزار قۋانىشەۆانىڭ جاقىندارى ءىستى قاراۋدى سوت كەيىنگە شەگەرىپ، قوسىمشا سارالاپ، جاڭا ايىپتاۋ ۋاقىتىن جاساۋعا پروكۋرورعا مۇمكىندىك بەرسە دەيدى.
مارقۇمداردىڭ جاقىندارى بالالاردىڭ اناسىنىڭ ولىمىنە سەبەپشى بولعان اكەلەردىڭ بالالاردى تاربيەلەۋگە دە قۇقىعى جوق دەپ ەسەپتەيدى.
