قاراعاندى وبلىسىنىڭ قىزىلجار اۋىلىندا تۇراتىن 111 جاستاعى تۇيمەكۇل اجەي ءالى كۇنگە قۇراق كورپە تىگىپ، قىمىز اشىتادى، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
قىزىلجار اۋىلىنا تۇسكەن كەز كەلگەن قوناق تۇيمەكۇل اجەيدىڭ شاڭىراعىنا سوعىپ، باتاسىن الۋعا اسىعادى. الىستان قىمىزىن اڭساپ كەلەتىندەر دە بار ەكەن.
تۇيمەكۇل تەمىرباەۆا 1910 جىلى جامبىل وبلىسىندا دۇننيەگە كەلىپ، كەيىن تۇرمىسقا شىققان سوڭ ايازباي اقساقالمەن ارقا جەرىنە قونىس اۋدارادى. سودان ۇزاق جىل جىلقى باعىپ، مال شارۋاشىلىعىمەن اينالىسقان.
«جىلقىشىعا كومەكشى بولىپ ءجۇردىم. ەكى جىلداي قاراعاندىعا بيە ساۋىپ، قىمىز اشىتىپ جىبەرىپ وتىردىق. ەگىنشىلەرگە دە جىبەردىك. شالىم جىلقى باعادى. بارماعان جەرىمىز جوق»،-دەيدى كەيۋانا.
اشتىقتى، سوعىستى كورگەن كەيۋانا 8 قۇرساق كوتەرگەن. قازىر 54 جاستاعى ەڭ كەنجە ۇلىنىڭ قولىندا تۇرادى. 20-عا جۋىق نەمەرەسى مەن 30-دان استام شوبەرەسى بار اجە بۇگىندە ءبىر عانا اۋلەتتىڭ ەمەس، ءبۇتىن ءبىر اۋىلدىڭ ءازيز اناسى. قارت انانىڭ ەستۋ قابىلەتى ازداپ جوعالعانمەن كوزى جاقسى كورەدى. ينەگە ءجىپتى ءوزى ساباقتاپ، ءىس تىگەدى. بىلگەنىن كەلىندەرى مەن نەمەرەلەرىنە ۇيرەتۋدەن جالىققان ەمەس.
«قارتى بار ءۇيدىڭ قازىناسى بار» دەمەكشى، اپامىز اق جاۋلىعى جەلبىرەپ، كىشكەنتاي كەزىمىزدەن بىزگە بار تاربيەسىن بەردى. اسىرادى، ءوسىردى. كىشكەنتاي كەزىمىزدە ەرتەگى ايتىپ بەرەتىن، ودان مەكتەپكە بارعاندا تاماعىمىزدى بەرەتىن. كەيىن وسكەن سوڭ، شارۋاعا ىلىككەن سوڭ بيە ساۋدى، سيىر ساۋدى ۇيرەتتى. قىمىزدى دا باپتاۋدى بىلەمىز، قولىمىزدان بارلىعى كەلەدى، اللاعا شۇكىر، اپامىز ۇيرەتىپ جاتىر»،-دەدى نەمەرەسى ايتولقىن ايازباي.
«ادىرنا» ۇلتتىق پورتالى
