باۋىرجان ومارۇلى بەلگىلى جۋرناليست ءدۇرالى دۇيسەباەۆتىڭ قازاسىنا قايعىرىپ، ءوز facebook پاراقشاسىندا جازبا جاريالادى، دەپ حابارلايدى “ادىرنا” ۇلتتىق پورتالى.
«جاس الاش» جۇزگە تولعان كۇنى باسىلىمنىڭ بۇرىنعى ساربازى ءدۇرالى دۇيسەباەۆ ومىردەن وزدى... قايران دۇراعاڭ... «لەنينشىل جاستا» بىرگە جۇمىس ىستەدىك. الماتىدا ءبىر ۇيدە، ءبىر پودەزدە ۇزاق جىل كورشى تۇردىق.
ايگىلى باعدات كوكەمىزبەن رەداكتسيانىڭ سەكرەتارياتىندا اڭگىمەلەسىپ وتىرعان مىنا سۋرەتىن جۋىردا عانا تاۋىپ الىپ، جەلىگە جۇكتەگەنىمىزگە قاتتى قۋانىپ ەدى. اللانىڭ بۇيرىعى وسىلاي بولىپتى... جاس كەزىندە سپورت جۋرناليستيكاسىندا جاسىن ويناتتى. كەيىنگى كەزدە بولاشاق جۋرناليستەردىڭ باپكەرى بولدى.
ساقشىلاردىڭ ساپىندا دا، جاقسىلاردىڭ جانىندا دا ابىرويلى ءجۇردى. ۇلت ءباسپاسوزىنىڭ ساربازىنان ساردارىنا دەيىنگى جولدان ءوتتى.
حوش، جانى جايساڭ جاقسى اعا! جەڭەشەمىزگە جانە كىشكەنە كۇنىنەن ورتاق اۋلامىزدا ويناپ وسكەن قىزدارىمىز نازەركە، بالاۋسا، ىڭكارعا كوڭىل ايتامىز.
