وتكىزگەن گيۆ، ۇتىستارى ءۇشىن انشىلەر تانىمال ادۆوكاتتىڭ ءوزىن سوتتاتىپ جىبەرگەن بە؟

963

الماتى قالاسى ادۆوكاتتار القاسىنىڭ مۇشەسى تىلەۋجان كىشكەنەباەۆتىڭ ۇستىنەن قىلمىستىق ءىس قوزعالىپ، 9 ناۋرىزدا المالى اۋداندىق سوتى ونى كىنالى دەپ تاپقان. سوت وعان 499 مىڭ تەڭگە ايىپپۇل سالىپ، 3 جىلعا ادۆوكاتتىق قىزمەتتەن شەتتەتتى، دەپ حابارلايدى Nege.kz سايتى.

رەداكتسيامىزعا حابارلاسقان ادۆوكاتتىڭ ايتۋىنشا، وعان «روزا القوجا، اقبوتا كەرىمبەكوۆا جانە جازيرا مەن جانبولاتتاردىڭ قىسىمىمەن ايىپ تاعىلعان» كورىنەدى.

ەستەرىڭىزدە بولسا، بىلتىر پاندەمياعا دەيىن بىرقاتار تانىمال انشىلەر لوتەرەيا ۇيىمداستىرىپ، ءتۇرلى ويىن ويناتا باستاعان-دى. انشىلەر جارناما جاساپ، قارجى پيراميدالارىنا ۇقساس، كۇماندى دۇنيەلەرگە حالىقتى لەگىمەن تارتا باستاعان.

«ينۆەستيتسيا قۇيساڭىزدار اقشاڭىزدى ەسەلەپ قايتارىپ الاسىزدار. ماسەلەن، 300 مىڭ سالساڭىز، 600 ءجۇز مىڭ قىلىپ الاسىز. ال 6,5 سالساڭىز،13 ميللليون ۇتىپ الاسىز» دەپ قىزىقتىرعان.

«2019 جىلى جازيرا مەن جانبولات تا جارناما جاسادى. سوعان ءبىر وتباسى 6,5 ميليون تەڭگە اقشا سالىپ جىبەرەدى. بىراق كەيىن جابىلىپ قالادى دا، كوپ ادام تاقىرعا وتىرادى.

روزا القوجا دا ويىن ۇيىمداستىرادى. ول دا بىرنەشە اۆتوكولىك، ءۇي تىگىپ، ەلدى قاتىسۋعا شاقىرادى. ءبارى ءادىل بولادى دەپ جارناما جاسايدى. وعان دا حالىق اقشا سالىپ، بيلەت ساتىپ الدى. انشىلەر ءمادي، ازات جانە باسقا دا ەكى جىگىتتى مەنىڭ مەنەدجەرلەرىم دەپ اتايدى. ولارمەن قالاي حابارلاسۋعا بولاتىنىن پوستتارىنا جازادى»، – دەيدى ادۆوكات.

ولار بيلەت ساتىپ العاندارعا  ويىن ۇيىمداستىرىلعانشا، باسقا ءبىر ۇسىنىس جاساي تۇراتىنىن ايتادى. «تەندەردەن مەديتسينالىق اپپاراتتاردى گەرمانيا مەن اقش-تان الدىرتامىز. سوعان ينۆەستيتسيا قۇيساڭىزدار، اقشاڭىزدى 15 كۇننىڭ ىشىندە ەسەلەپ قايتارىپ الاسىزدار» دەپ ۇگىتتەيدى. روزا القوجاعا سەنگەن حالىق اقشاسىن اكەپ سالا باستايدى.

«جارنامادا: «ءبىز – شاريعات جولىنداعى ادامدارمىز، نامازحانبىز. ءىسىمىز ادال»، – دەپ ۋاعىز ايتادى. «سول ۆيدەونى كورىپ، ءوزىم دە اقشا سالعىم كەلىپ كەتتى. ادەمى جەتكىزەدى. ويىندار بولادى. بىراق اقشاسىن انە بەرەمىز، مىنە بەرەمىز دەپ سوزا بەرەدى.

ەكىنشى ويىن باستالعاندا روزا القوجا باس تارتادى. ارى قاراي اقبوتا كەرىمبەكوۆا جالعاستىرادى. ينۆەستيتسيا تارتۋ قايتا جالعاسادى. سوسىن مۇنىڭ دا ارتى سۇيىرقۇيىمشاقتانىپ كەتەدى. حالىق الدانعانىن ءبىلىپ، ادۆوكاتتاردى ىزدەيدى. مەنى تابادى. بۇلار حالىقتى ويىنعا شاقىرىپ الىپ، الداپ تۇر. قارجى پيراميداسىنا ۇقساس بىردەڭە»، – دەيدى ادۆوكات.

وزدەرىڭىزگە بەلگىلى، قاڭتار ايىنان باستاپ ناۋرىزعا دەيىن ەرنار ايدار دا لوتەرەيا ويناتا باستاعان. تىگىلگەن ماشينەلەرىنىڭ ءبارى جالعا الىنعان كولىكتەر بولىپ شىعادى. لوتەرەيا ۇيىمدارىنىڭ ءبىرى مۇنى بايقاپ قالىپ، ەكونوميكالىق تەرگەۋ دەپارتامەنتىنە ارىز تۇسىرەدى. ەرنار ايداردىڭ قالاي ۇستالعانىن ءالى ەشكىم ۇمىتا قويماسا كەرەك.

«نەگىزى، ۇيىمداستىرىپ جۇرگەن قاسىندا ەكى سەرىگى بار – ءمادي، ازات دەگەن جىگىتتەر. انشىلەردى اينالدىرىپ جۇرگەندەر وسىلار. «ءوزىمنىڭ ويىنىم» دەپ ايتقىزعان. ەرنار ايدار ۇستالعاندا، ماشينە ۇتقانداردىڭ ءبارى – «وتىرىك ادامدار»، ىستەمەيتىن نومىرلەردى كومپيۋتەرگە تىركەپ قويعان. بۇل تەلەارنالار باعدارلاماسىندا ايتىلىپ، شۋ بولدى. وتىرىك نومىرلەردى انىقتادى. باعدارلاماعا ءوزىم دە قاتىستىم»، – دەيدى تىلەۋجان جۇمابەكۇلى.

كوپ ادام الدانىپ قالىپ، زاڭگەردەن اقشاسىن قايتارىپ بەرۋگە كومەكتەسۋدى سۇرايدى. ادۆوكات ەكونوميكالىق تەرگەۋ دەپارتامەنتىنە اقبوتا كەرىمبەكوۆانىڭ، جازيرا مەن جانبولاتتىڭ، روزا القوجانىڭ جانە ولاردىڭ ارتىندا تۇرعانداردىڭ ۇستىنەن قىلمىستى ءىستى قوزعاۋ تۋرالى ارىز جازا باستاعان. «ءبىر ادامعا عانا قىلمىستىق ءىس قوزعالىپ، قالعاندارىنا سۇراۋ سالىنباعانى قاتتى تاڭداندىردى»، – دەيدى ادۆوكات.

ەشكىم جاۋاپ تا الماعان. سۇراستىرىپ كورسە: «كارانتين باستالىپ كەتتى، انشىلەر اۋىرىپ جاتىر ەكەن» دەپ جاۋاپ بەرەدى تەرگەۋشىلەر.

«شىندىعىندا، انشىلەر ينستاگرامدا ۇدايى وتىرعانىن كورىپ جۇردىك. تەرگەۋشىنىڭ سوزبالاڭعا سالىپ جۇرگەنىن سەزىپ، ونىڭ ۇستىنەن پروكۋروراتۋراعا شاعىم ءتۇسىردىم. ودان قايران بولماعان سوڭ، «جۇمىس ىستەمەي جاتىر» دەپ، پروكۋروردىڭ دا ۇستىنەن شاعىمداندىم. تىم-تىرىس. اقىرىندا بۇقارالىق اقپارات قۇرالدارىنا جۇگىندىم. جوعارى باسشىلىق قاداعالاماسا، بۇل ءىستى جىلى جاۋىپ تاستاپ جاتىر دەپ شىرىلدادىم. كەيبىر انشىلەردىڭ ءبىرى ۆاتسابىما حابارلاسىپ قارعاپ-سىلەپ، «نەگە قويمايسىڭ» دەپ قوقان-لوقى كورسەتتى»، – دەيدى تىلەۋجان كىشكەنەباەۆ.

بىراق ادىلدىك ىزدەپ جۇرگەن مۇنىڭ ءوزىنىڭ ۇستىنەن قىلمىستىق ءىس قوزعالا باستاعاندا اڭ-تاڭ بولعان. ادۆوكاتتىڭ پىكىرىنشە، بۇل ءىس انشىلەردىڭ ىقپالىمەن بولىپ جاتقان كورىنەدى.

«2017 جىلى ءبىر ىسكە ادۆوكات رەتىندە قاتىستىم. ول جەردە ۋچاسكەلىك پوليتسەيدىڭ قىلمىسى انىقتالادى. سول ءىسى ءۇشىن ءۇش جىلعا سوتتالادى. ءىس جابىلادى. بىراق ول ءىس قازىر قايتا قارالىپ، مەن قۋعىنعا ۇشىرادىم. بۇل – جوعارىدان بەرىلگەن تاپسىرما. وشتەسۋ! ۇستىمىزدەن ارىزداندىڭ دەپ قالا پروكۋرلارى دا ەرەگىستى»،– دەيدى ادۆوكات.

ءبىر قىزىعى، بۇل ىسكە بەس ەپيزود بويىنشا، ەكى ادۆوكات قاتىسقان. بىراق ەكىنشى ادۆوكاتتى ىزدەپ جاتقان ەشكىم جوق ەكەن.

«ويتكەنى، ونىڭ كىناسى جوق. مەنىڭ دە كىنام جوق. مەنىڭ قورعاۋىمدا قازىر 50 ادام بار. اماناتىن العان سوڭ، ولاردى قالاي جارتى جولدان تاستاپ كەتەمىن؟ روزا القوجا نەمەسە اقبوتا كەرىمبەكوۆا قىسىم كورسەتتى دەپ تاستاپ كەتەمىن بە؟ سۋديا مەن پروكۋرورلاردان قورىقسام، قالاي ادۆوكات بولامىن؟» – دەپ ساۋال تاستايدى تىلەۋجان كىشكەنەباەۆ.

ادۆوكاتتىڭ ايتۋىنشا، ارىپتەستەرى وعان بارىنشا قولداۋ كورسەتىپ جاتىر. 25 ادۆوكات ءىستى قاراپ شىعىپ، قايتا كوتەرىلگەن ىستە ەشقانداي قىلمىستىق قۇرامنىڭ جوقتىعىن العا تارتقان.

«ادۆوكاتتارعا قىسىم جالعاسا بەرسە، بۇۇ-عا دەيىن شاعىمدانامىز»، – دەيدى ت.كىشكەنەباەۆ.

پىكىرلەر
رەداكتسيا تاڭداۋى