الەۋمەتتىك جەلىلەردە 76 جاستاعى جالعىزباستى زەينەتكەردىڭ ۇيىنە الداپ كىرىپ، پىشاقپەن قورقىتىپ، باعالى بۇيىمدارى مەن اقشاسىن الىپ كەتكەن كۇدىكتى تۋرالى اقپارات تاراعان ەدى. ءوز كەزەگىندە تۇرعىندار چاتتار ارقىلى ساق بولۋ قاجەتتىلىگى تۋرالى حابارلامالار تاراتقان، – دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
اتىراۋ وبلىسى پوليتسيا دەپارتامەنتىنىڭ قىزمەتكەرلەرى جۇرگىزگەن ارنايى جەدەل-ىزدەستىرۋ ءىس-شارالارى بارىسىندا وسى قىلمىستى جاساۋعا قاتىسى بار ماحامبەت اۋدانىندا تۋعان 31 جاستاعى ازامات ۇستالدى. ءوز كىناسىن تولىق مويىنداعان كۇدىكتىدەن ايعاق زات رەتىندە التىن بۇيىمدار الىندى.
ايتا كەتەيىك، كۇدىكتى 14 ناۋرىز كۇنى ساعات 08:00 شاماسىندا جابىرلەنۋشىنىڭ ۇيىنە زاڭسىز كىرىپ، 1945 جىلى تۋعان ازاماتشانى ۇشكىر زاتپەن قورقىتىپ، ءتۇرلى كۋپيۋرالاردان تۇراتىن 14 000 تەڭگە اقشاسى مەن التىن بۇيىمدارىن الىپ كەتكەن. كەلتىرىلگەن زالال 114.000 تەڭگە. اتالعان دەرەك بويىنشا اتىراۋ قالاسىنىڭ №2 پوليتسيا ءبولىمى قىلمىستىق كودەكستىڭ 192-بابىنىڭ 3-بولىگىمەن (قاراقشىلىق) سوتقا دەيىنگى تەرگەپ-تەكسەرۋ جۇرگىزۋدە. كۇدىكتى ۋاقىتشا ۇستاۋ يزولياتورىنا قاماۋعا الىندى. وزگە اقپارات قىلمىستىق-پروتسەستىك كودەكستىڭ 201-بابىنا سايكەس جاريالاۋعا جاتپايدى.
«ادىرنا» ۇلتتىق پورتالى
