بايدەن اقساقالدىڭ سوزىنەن كەيىن، اقشتىڭ ورتا ازيادا ىقپالى كۇشەيۋى كەرەك. ول زاڭدى پروتسەسس. ءار ءتۇرلى فوندتار مەن مەملەكەتتىك ەمەس ۇيىمداردىڭ اتىن جامىلعان ساياسي ميسسيونەرلەر كەلۋى كۇتىلۋدە. تالايى كەلىپ تە قويعان شىعار. باستى ماقسات - قازاقستاندى رەسەي ىقپالىنان الىستاتۋ، قازاقستان-رەسەي قارىم-قاتىناسىنا كولەڭكە ءتۇسىرۋ، قازاق ۇلتشىلدارى مەن قازاقستان وپپوزيتسياسىنا استىرتىن كومەكتەسۋ.
الايدا، رەسەي ءبىز ءۇشىن تاريحي كورشى ءارى ساياسي-اسكەري پارتنەر بولعاندىقتان، ءبىزدىڭ مەملەكەتتىڭ ارنايى كۇشتەرى اقش ىقپالىنىڭ تارالۋىنا قارسى جۇمىس جۇرگىزەدى دەپ ويلايمىن. ونىڭ ۇستىنە ۇلتتىق قاۋىپسىزدىك قىزمەتىنىڭ باسشىلىعىندا رەسەي اكادەمياسىن تامامداعان پولكوۆنيك-گەنەرالدار جوق ەمەس، سونىمەن قاتار قورعانىس ءمينيسترى نۇرلان ەرمەكباەۆتىڭ دا، روسنەفت كومپانياسىنىڭ يەسى، يگور سەچينمەن دوس ەكەنى ءمالىم. ايگىلى قايرات قوجامجاروۆتىڭ دا دميتري مەدۆەدەۆپەن كۋرستاس ەكەنىن ۇمىتپاڭىز.
وسىنىڭ بارلىعى قازاقستاندى رەسەي فەدەراتسياسىنىڭ وربيتاسىندا ۇستاۋعا كەپىل بولادى.
ال اقش ءبىزدىڭ ەستەبليشمەنتتەگى اتقا مىنەرلەردىڭ امەريكا مەن ەۆروپا بانكتتەرىندەگى قاراجاتتارىن تارتىپ الۋىمەن بوپسالاۋى مۇمكىن. تالاي جىلجىمايتىن مۇلىك قازاق بايلارىنىڭ اتىندا جاتىر، ونى اقش ءبىلىپ وتىر. تالاي شەنەۋنىك پەن وليگارحتىڭ ميللياردتارى شۆەيتساريا مەن ليۋكسەمبۋرگتا جاتقانىن دا ۇمىتپاڭىز. وسىنىڭ بارلىعى اقش ءۇشىن ول تاپتىرمايتىن ىقپال قۇرالى.
توق ەتەرى، رەسەي مەن اقش قاقتىعىسى ەندى باستالدى. ءپۋتيننىڭ مىنەزى دۇنيەگە ءمالىم. اينالاسىندا ۇرىسپاعان كورشىسى قالمادى. بايدەن اقساقالدىڭ "سالاسالەيكۋم" سوزىنەن كەيىنگى ءسوزى "پۋتين قىلمىسكەر" بولدى. قازاقستان اسكەري سوعىس الاڭىنا اينالماسا دا، ساياسي سوعىس الاڭىنا اينالاتىنىنا تولىق سەنىمدىمىن.
بۇل جەردە كوپ نارسە سىرتقى ىستەر مينيسترلىگىنە بايلانىستى. 2022-2024 جج ءسىم ءۇشىن وتە اۋىر جىلدار بولادى دەپ بولجايمىن. ورىسپەن دە دوستىقتى جوعالتپاي، الپاۋىت اقشپەن دە امان-سالەم ءتۇزۋ بولىپ قالۋ كەرەك. جەرىمىز ۇلكەن بولعانىمەن، جەرىمىزدى قورعايتىن قالقانىمىز جوق ...
سامات نۇرتازا،
"ادىرنا" ۇلتتىق پورتالى
