ورالدا 13 جاستاعى وگەي قىزىن زورلادى دەپ ايىپتالعان قالا تۇرعىنى سوتتا جاۋاپقا تارتىلۋدا دەپ حابارلايدى "استانا" تەلەارناسى.
باتىس قازاقستان وبلىستىق سوتىنىڭ مالىمەتىنە سايكەس، ءىس قىلمىستىق كودەكستىڭ ەكى بابى بويىنشا قوزعالىپتى. جابىرلەنۋشى تاراپ سوتتالۋشىعا قاتاڭ جازا قولدانۋدى تالاپ ەتىپ وتىر.
جابىرلەنۋشى كۇيەۋىنىڭ سوققىسىنا شىداپ كەلگەنىن العا تارتتى. كەزەكتى ۇرىس-كەرىس شەگىنە جەتكەندە، ۇلكەن قىزى وگەي اكەسىنىڭ وزىنە جاساعان وزبىرلىعىن جىلاپ وتىرىپ جەتكىزىپتى. سودان كەيىن اناسى بىردەن پوليتسەيلەرگە جۇگىنگەن.
"قىزىم بۇل سۇمدىقتان ءالى ەسىن جيار ەمەس. قازىر ەمدەلىپ جاتىر، پسيحولوگتار ونىڭ قايتا قالپىنا كەلۋى، ءالى 4-5 جىلعا سوزىلاتىنىن ايتادى. ال مۇنداي اۋىر جان جاراسى ءومىر بويىنا قالادى دەيدى. شىنىمدى ايتسام، كۇيەۋىمنەن قاتتى قورقامىن. قازىر قىزدارىمنىڭ تاعدىرى قىل ۇستىندە تۇر. سوندىقتان سوت ءادىل جازاسىن بەرەدى دەپ ۇمىتتەنەمىن", - دەيدى جابىرلەنۋشى.
ايىپتالۋشى تاراپ بولسا، تاعىلعان ايىپتارمەن كەلىسپەي وتىر. بىراق سۇحبات بەرۋدەن باس تارتتى. ال ادۆوكاتى بۇل ءىستىڭ نۇكتەسىن سوت قوياتىنىن العا تارتتى.
"بۇگىن سوتتا وزىمە بەلگىلى بولعان اقپاراتتى ايتپاۋعا مىندەتتەلىپ، قول قويدىم. كونستيتۋتسياعا سايكەس، كىناسى دالەلدەنىپ، سوت ۇكىمى شىقپايىنشا، ەشكىمدى كىنالاۋعا بولمايدى. سوندىقتان، سوت ءىستى ءادىل قارايدى دەپ سەنەمىز", - دەيدى ايىپتالۋشىنىڭ قورعاۋشىسى مەرەكە عابدۋاليەۆ.
ءىس سوتتا جابىق جاعدايدا قارالۋدا.
"ايىپتالۋشى قىلمىستىق كودەكستىڭ 121-بابىنىڭ 4-بولىگى، 124-بابىنىڭ 2-بولىگىمەن، ياعني سەكسۋالدىق سيپاتتاعى زورلىق-زومبىلىق جانە جاس بالانى ازعىندىق جولعا ءتۇسىرۋ دەگەن باپ بويىنشا سوتقا بەرىلدى", - دەيدى بقو سوتى ءباسپاسوز قىزمەتىنىڭ باسشىسى نۇرگۇل قاناتباەۆا.
اجىراسۋعا ارىز بەرگەن ەرلى-زايىپتىلار بۇگىندە اراداعى دۇنيە-مۇلىكتى دە ءوزارا بولىسكە سالىپتى. ال ايىپتالۋشىنىڭ جاسوسپىرىمگە ءزابىر كورسەتكەنى دالەلدەنسە، زاڭ بويىنشا 7 جىلدان 20 جىلعا دەيىن باس بوستاندىعىنان ايىرۋ جازاسى قاراستىرىلعان.
