قاسىم-جومارت توقاەۆ الماتى قالاسىنىڭ دەنساۋلىق ساقتاۋ سالاسىنداعى كۇردەلى احۋالى تۋرالى باياندادى
ايتۋىنشا، كۇردەلى ماسەلەلەر كوروناۆيرۋستىڭ ارتىندا ءمان بەرمەي قالىپ قويىپ جاتىر.
– جالپى ازاماتتاردىڭ مەديتسينالىق قىزمەت كورسەتۋ ساپاسىنا كوڭىلى تولمايتىنىن ايتۋىمىز كەرەك. مەديتسينا كادرلارىنىڭ جەتىسپەۋشىلىگى دە كوپتىڭ كوكەيىندەگى كۇرمەۋلى ماسەلە. بۇل پروبلەما جىلدار بويىنا شەشىلمەي كەلە جاتىر. اسىرەسە، كەشەگى توتەنشە جاعداي رەجيمى كەزىندە بۇل ماسەلەنىڭ وزەكتىلىگى ارتا ءتۇستى. قالاعا 300-گە جۋىق دارىگەر قاجەت. بۇل وتە كوپ. ەگەر الماتىدا جاعداي وسىنداي بولسا، وندا شەت جاتقان ايماقتار تۋرالى نە ايتۋعا بولادى؟! اتالعان جاعدايدى قالانىڭ دەنساۋلىق ساقتاۋ باسقارماسىنداعى كادرلاردىڭ توقتاۋسىز اۋىسۋى ۋشىقتىرىپ جىبەرىپ وتىر. وندا جەمقورلىققا قاتىستى زاڭ بۇزۋشىلىقتار ورىن الدى. قالاي ايتساق تا، دەنساۋلىق ساقتاۋ باسقارماسىندا تۇراقتىلىق بولعان جوق. اكىمدىك بۇل ماسەلەلەردى شەشۋمەن ناقتى اينالىسۋ كەرەك، – دەدى پرەزيدەنت.
– مەن تاعى دا وتانداستارىمىزدى سابىر ساقتاۋعا، بارلىق سانيتارلىق نورمالاردى قاتاڭ ۇستانۋعا، كوروناۆيرۋسقا قارسى جاپپاي ۆاكتسيناتسيانى قولداۋعا شاقىرامىن. ۇكىمەت پەن اكىمدىكتەر جاپپاي ۆاكتسيناتسيا جۇرگىزۋگە دايىن بولۋى كەرەك. ءبىز 1 اقپاننان ۆاكتسيناتسيا جۇمىسىن باستادىق. بىراق ءدال قازىرگى ۋاقىتقا دەيىن ۆاكتسينا سالدىرعان ازاماتتاردىڭ سانى 19 مىڭنان ءسال عانا اسادى. جوسپار بويىنشا ءبىز 6 ميلليوننان استام ادامعا ۆاكتسينا سالدىرۋىمىز كەرەك. ەگەر ءوز ءوندىرىسىمىزدىڭ قۋاتى مەن رەسەيدەن اكەلىنەتىن ۆاكتسينا جەتپەي جاتسا، وندا نارىققا شىعىپ، قاجەتتى كولەمدى يمپورتتاۋ قاجەت. جاپپاي يممۋنيتەت قالىپتاستىرماي اۋرۋدى جەڭە المايمىز، ەكونوميكانى قايتا قالپىنا كەلتىرۋ دە مۇمكىن ەمەس. ۇكىمەتكە اتالعان جۇمىستى جانداندىرۋدى تاپسىرامىن. بۇل ماسەلەنى ءوزىم باقىلاپ وتىرامىن. ۆاكتسيناتسياعا دۇرىس قاراۋ كەرەك، بۇدان باسقا جول جوق. وسى ماسەلەنى ازاماتتاردىڭ ەسىنە تاعى ءبىر مارتە سالعىم كەلەدى، – دەدى مەملەكەت باسشىسى.
