قاسىم-جومارت كەمەلۇلى توقاەۆ «تاۋەلسىزدىك بارىنەن قىمبات» اتتى ماقالاسىندا ناۋرىز مەيرامىن اتاپ ءوتۋدىڭ تۇجىرىمداماسىن جاساپ، كوكتەم مەرەكەسىنىڭ مازمۇنىن بايىتا ءتۇسۋدى ۇسىندى. ىزىنشە تۇجىرىمداما جوباسى جاسالىپ، كوپشىلىك تالقىسىنا شىقتى.
ۇلتتىق سالت-ءداستۇرىمىزدىڭ اجىراماس بولىگى بابالاردان بىزگە جەتكەن ەجەلگى ناۋرىز مەرەكەسىنىڭ ءمان-ماعىناسىن ارتتىرۋ ورتاق مىندەتىمىز جانە رۋحانياتتىڭ التىن قازىعى قازاق راديوسى بۇل جۇمىسقا ەرەكشە ەكپىنمەن كىرىستى.
وسى رەتتە، ۇلىق مەرەكە قارساڭىندا، 17 ناۋرىز كۇنى، قازاق راديوسى، جەتى مەملەكەتتىڭ راديوارنالارىنىڭ باسىن قوسىپ، تىكەلەي ەفيردە «ناۋرىز-2021» حالىقارالىق راديوكوپىرىن ۇيىمداستىرادى.
ءىرى حالىقارالىق جوبا اياسىندا تىكەلەي ەفيردە يران، تۇركيا، ءازىربايجان، موڭعوليا، قىرعىز رەسپۋبليكاسى، وزبەكستان رەسپۋبليكاسى، تاتارستان رەسپۋبليكاسى راديوارنالارىمەن اۋە تولقىنى ارقىلى بايلانىس ورناتىپ، ناۋرىز مەيرامى ورتاق حالىقتارمەن مەرەكەنىڭ ءمانىن ايشىقتاۋعا، باۋىرلاس جانە ىرگەلەس ەلدەردىڭ ۇلتتىق دۇنيەتانىمىن تىڭداۋشىعا جەتكىزۋگە تىرىسامىز.
راديوكوپىردە رەسەي، فرانتسيا، اۆستريا، بەلگيا، كورەيا، جاپونيا ەلدەرىندەگى تىڭداۋشىلارمەن تىكەلەي تولقىندا تىلدەسەتىن بولامىز.
جەتى مەملەكەت قاتىساتىن «ناۋرىز-2021» حالىقارالىق راديوكوپىرى تۇڭعىش رەت ۇيىمداستىرىلىپ وتىر. ءۇش ساعاتتىق راديوكوپىر قازاق راديوسىنان بولەك «شالقار» راديوسىنىڭ تىكەلەي ەفيرىنەن دە بەرىلەدى.
حالىقارالىق شارا قازاق راديوسىنىڭ 100 جىلدىعىنا ورايلاسقان. 1921 جىلى ۇلت ۇستازى احمەت بايتۇرسىنۇلىنىڭ باستاماسىمەن ورىنبور قالاسىنان اقپارات تاراتا باستاعان باس راديو قازىر ەل اۋماعىنىڭ 90 پايىزىنا اقپارات جەتكىزەدى.
دۋلات ابيبۋللاەۆ
