گازدان ۋلانعان 5 ادامنىڭ ولىمىنە سەبەپكەر بولۋى مۇمكىن

2633
Adyrna.kz Telegram

گازدان ۋلانعان بەس ادامنىڭ قازا بولۋىنا كۇدىكتى رەتىندە تۇركىستان قالاسىنىڭ تۇرعىنى ۇستالدى، – دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.

تۇركىستان وبلىسى پد تەرگەۋ باسقارماسىنىڭ وندىرىسىندە تۇركىستان قالاسىنىڭ جەرگىلىكتى تۇرعىن ۇيلەرىنىڭ بىرىندە ۋلى گازبەن ۋلانىپ، بەس ادامنىڭ قازا بولۋىنا بايلانىستى سوتقا دەيىنگى تەرگەۋ جۇمىستارى جۇرگىزىلۋدە.

اتالعان جايت تۇركىستان قالالىق پوليتسيا باسقارماسىندا سدتبت-عا قر قك-ءنىڭ 292-بابى 3-بولىگى ء(ورت قاۋىپسىزدىگى تالاپتارىن بۇزۋ) بويىنشا تىركەلدى. پوليتسيا قىزمەتكەرلەرى بولعان وقيعانىڭ اۋىرلىعى مەن قوعامدىق رەزونانس تۋدىرۋىنا بايلانىستى جەدەل-تەرگەۋ شارالارىن اتقاردى. ونىڭ ىشىندە ساراپتامالار تاعايىندالىپ، كۋاگەرلەردەن جاۋاپتار الىنىپ، قاجەتتى دەگەن بارلىق جۇمىستار جۇرگىزىلدى.

– ۋلى گازدان ءبىر وتباسىنىڭ بەس بىردەي مۇشەسى قازا بولىپ، ءبىزدىڭ وبلىستا ۇلكەن رەزونانس تۋدىردى. تۇركىستان وبلىسى تەرگەۋ باسقارماسىمەن اتالعان جايتقا بايلانىستى قر قك-ءنىڭ 306-بابى (قاۋىپسىزدىك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەردى كورسەتۋ) بويىنشا سوتقا دەيىنگى تەرگەۋ ارەكەتتەرى جۇرگىزىلۋدە. بۇگىنگى تاڭدا بۇل قىلمىستى جاسادى دەگەن كۇدىكتىلەردىڭ ءبىرى تۇركىستان قالاسىنىڭ تۇرعىنى ۇستالدى. ول گاز ورناتۋ فيرمالارىنىڭ بىرىندە ديرەكتور. تياناقتى جۇرگىزىلگەن تەرگەۋ جۇمىستارىنىڭ اياسىندا ونىڭ ىسكە قاتىسى بار ەكەنى دالەلدەندى. ءبىز كۇدىكتىلەر سانىنىڭ ارتۋىن جوققا شىعارمايمىز. سوندىقتان تەرگەۋ جالعاسادى، – دەپ اتاپ ءوتتى تۇركىستان وبلىسى پوليتسيا دەپارتامەنتى تەرگەۋ باسقارماسىنىڭ باستىعى نۇرماحان جالعاسوۆ.

ەستەرىڭىزگە سالا كەتەيىك، اقپان ايىنىڭ سوڭىندا تۇركىستان قالاسىنداعى جەر ۇيلەردىڭ بىرىندە بەس ادام، ياعني ايەل مەن ونىڭ ءتورت بالاسى قازا تاپقان. قازانىڭ سەبەبى – ۋلى گازدان ۋلانۋ. وقيعا ورنىنا تۇركىستان وبلىسى پوليتسيا دەپارتامەنتى باستىعى، تجد باستىعى، اكىمدىك جانە باسقا دا قىزمەت وكىلدەرى بارعان بولاتىن. تەرگەۋ بارىسىن تۇركىستان وبلىسىنىڭ اكىمى ومىرزاق شوكەەۆ جەكە باقىلاۋىنا الدى.

«ادىرنا» ۇلتتىق پورتالى

پىكىرلەر