مەملەكەتتىك كىرىستەر كوميتەتى كاسىپكەرلەردى QR-كود ارقىلى سايكەستەندىرۋ جوباسىن باستادى. سونىڭ كومەگىمەن چەك بەرمەگەن نەمەسە تارازىدان جەگەن ساۋداگەردىڭ ۇستىنەن شاعىم تۇسىرۋگە بولادى، دەپ حابارلايدى رەسمي سايت.
ول ءۇشىن تۇتىنۋشىلار جابىق بازارلار، ساۋدا ۇيلەرى، دۇكەندەر مەن پاۆيلوندار اۋماعىندا كوتەرمە جانە بولشەك ساۋدا جاسايتىن كاسىپكەرلەر مەملەكەتتىك كىرىستەر كوميتەتىنىڭ پورتالىنداعى (kgd.gov.kz) "اقپاراتتىق رەسۋرستار" قوسىمشا ارقىلى شتريح-كودتى (QR-كودتى) جۇكتەۋى ءتيىس.
"سول ارقىلى كاسىپكەردىڭ جسن/بسن-ى، اتاۋى، باقىلاۋ-كاسسا ماشيناسىنىڭ ورنالاسقان جەرى، سالىق تولەۋشىنىڭ مارتەبەسى، الكوگول ونىمىنە ليتسەنزيانىڭ بار-جوعى جانە تاعى باسقا اقپارات سايكەستەندىرىلەدى", – دەلىنگەن رەسمي حابارلامادا.
ال ساتىپ الۋشىلار QR-كودتىڭ كومەگىمەن كەز كەلگەن ۋاقىتتا كاسىپكەردىڭ ۇستىنەن شاعىم تۇسىرە الادى. ول ءۇشىن شتريح-كودتى سكانەرلەۋ كەرەك.
"مىسالى، فيسكالدى چەك بەرىلمەسە، بانك كارتاسىن قابىلداماعان جاعدايدا نەمەسە الكوگول ونىمىنە ليتسەنزياسى بولماسا، ساتىپ الۋشى ۇيالى تەلەفونىنىڭ كومەگىمەن QR-كودتى سكانەرلەپ، پيلوتتىق جوباعا قاتىسۋشى كاسىپكەردىڭ ۇستىنەن مەملەكەتتىك كىرىستەر ورگانىنا شاعىم جولداي الادى", – دەيدى كوميتەت ماماندارى.
شاعىم تۇسكەننەن كەيىن مەملەكەتتىك كىرىستەر ورگانىنىڭ ينتەرنەت-رەسۋرسىندا تەكسەرىس تۋرالى شەشىم جاريالانادى. بىراق ونى ءۇش كۇن بۇرىن ورنالاستىرۋ قاجەت. وسىدان كەيىن ماماندار بەينە تىركەۋ نەمەسە فوتوفيكساتسيا قۇرالدارىن الىپ، ساۋدا ورنىنا ۆيزۋالدى تەكسەرىس جاسايدى. ازىرشە، پيلوتتىق جوباعا اشىق بازارلار قاتىسپايدى.
