اقتوبەدە كوپبالالى اناعا سەرتيفيكات تابىستاعان وبلىس اكىمىنىڭ باسى داۋعا قالدى. ايسۇلۋ كۇزدىباەۆاعا العىس ايتۋ كۇنى وڭداسىن ورازالين ەل الدىندا ەكى ميلليون تەڭگە دەپ جازىلعان قاعاز ۇستاتادى. ال ونىسىنىڭ كوك تيىن قۇنى بولماي شىقتى، دەپ حابارلادى كتك.
شەنەۋنىكتەر ەرىكتىلەردىڭ ەڭبەگىن ءوزى ەنشىلەمەك بولعان. اكىمدىكتەگىلەر قايىرىمدى جانداردىڭ بۇعان دەيىن كورسەتكەن كومەگىن سەرتيفيكاتقا جازىپ بەرگەنىن مويىنداپ وتىر. اناۋ-مىناۋ ەمەس، ءوڭىر باسشىسىنىڭ ءوزى 2 ميلليوننىڭ سەرتيفيكاتىن سالتاناتتى تۇردە تابىستاعاندا اقتوبەلىك ايسۇلۋ كۇزدىباەۆانىڭ قۋانىشىندا شەك بولماپتى. كەيىن وڭداسىن ءورازاليننىڭ ۇستاتقانى قۇنى جوق قۇر قاعاز ەكەنىن بىلگەندە سالى سۋعا كەتكەن. قازىر ول سەرتيفيكات كىشكەنتايلارىنىڭ ويىنشىعىنا اينالدى. بۇلاي جۇرت الىندا كادەگە جارامايتىن سەرتيفيكاتتى بەرۋدىڭ نە قاجەتى بار ەدى دەيدى كوپبالالى انا.
"ەكى ميلليوننىڭ ۇستىنە شامالى اقشا قوسىپ ءۇي الامىن دەپ ويلادىم. بەرگەن كەزدە قۋاندىم، وتىرىك ايتپايىن. كورشىلەرىم قۇتتى بولسىن ايتىپ كەلدى. ەكى ميلليون الىپسىڭ دەدى. بۇل قۇر قاعاز بولىپ شىقتى. ماعان بۇل اقشا بەرىلگەن جوق", - دەيدى كوپبالالى انا ايسۇلۋ كۇزدىباەۆا.
جاتاقحانانىڭ اياداي بولمەسىندە بەس بالاسىمەن تۇراتىن ايسۇلۋ جىل باسىندا الەۋمەتتىك جەلى ارقىلى ەلدەن كومەك سۇراعان. سول كەزدە ەرىكتىلەر كەرەك-جاراعىن الىپ بەرىپ، بولمەسىنە جوندەۋ جۇرگىزىپتى. ال اكىمدىك تاراپىنان ەشقانداي قولداۋ بولماعان.
"ول وتباسىنىڭ تۇرمىستىق جاعدايى قيىن ەكەن. جاستار بولىپ ءوزىمىز جوندەۋ جۇمىسىنا اقشا جينادىق. ەدەنىنەن باستاپ، توبەسى مەن قابىرعاسىنا دەيىن جاڭالاپ بەردىك. قوسىمشا كەرەكتى جيھاز بەن تەلەديدار الىپ بەردىك", - دەيدى ەرىكتى شاحرەتدين ازيموۆ.
وقي وتىرىڭىز: دانيال احمەتوۆ شكافتىڭ ەسىگىن اشىپ جاتقان كەزدە كۇتپەگەن جاعداي بولدى – ۆيدەو
ەرىكتىلەردىڭ ەڭبەگىن ەنشىلەپ، جومارت جاندار جيناپ بەرگەن قارجىنى سەرتيفيكاتقا 2 ميلليون دەپ جازىپ بەرگەندەرىن شەنەۋنىكتەر دە مويىندايدى. بىراق كوك تيىن قۇنى جوق ءبىر جاپىراق قاعازدى كوپبالالى اناعا سالتاناتتى تۇردە تاپسىرۋعا نە تۇرتكى بولعانىن ءتۇسىندىرىپ بەرە الماي وتىر.
"وسى يگى ءىستى باسقالارعا ۇلگى ەتۋ ماقساتىندا جاستاردىڭ اتىنان سەرتيفيكات تاپسىرىپ، ولارعا العىسىمىزدى بىلدىرگىمىز كەلدى. وندا ايسۇلۋ حانىمعا جۇمسالعان قارجىنى كورسەتتىك", - دەيدى اقتوبە وبلىسى قحا حاتشىلىعىنىڭ مەڭگەرۋشىسى مارجان قورعانباەۆا.
بەس بالانىڭ اناسى ايسۇلۋ كۇزدىباەۆانىڭ اتىندا باسپانا جوق. تۇرىپ جاتقان جاتاقحاناداعى بولمەسىن تۋىستارى بەرگەن. جولداسى قىستاۋعا قاتىناپ قوي باعادى. ال اكىمدىكتەگىلەر وسى داۋدان سوڭ قانداي دا ءبىر كومەك بەرۋ تۋرالى جاق اشپاي وتىر. ەڭ بولماعاندا كەشىرىم سۇراپ باراتىنىن دا ايتپادى.
