Aqtóbede kópbalaly anaǵa sertıfıkat tabystaǵan oblys ákiminiń basy daýǵa qaldy. Aısulý Kúzdibaevaǵa Alǵys aıtý kúni Ońdasyn Orazalın el aldynda eki mıllıon teńge dep jazylǵan qaǵaz ustatady. Al onysynyń kók tıyn quny bolmaı shyqty, dep habarlady KTK.
Sheneýnikter eriktilerdiń eńbegin ózi enshilemek bolǵan. Ákimdiktegiler qaıyrymdy jandardyń buǵan deıin kórsetken kómegin sertıfıkatqa jazyp bergenin moıyndap otyr. Anaý-mynaý emes, óńir basshysynyń ózi 2 mıllıonnyń sertıfıkatyn saltanatty túrde tabystaǵanda aqtóbelik Aısulý Kúzdibaevanyń qýanyshynda shek bolmapty. Keıin Ońdasyn Orazalınniń ustatqany quny joq qur qaǵaz ekenin bilgende saly sýǵa ketken. Qazir ol sertıfıkat kishkentaılarynyń oıynshyǵyna aınaldy. Bulaı jurt alynda kádege jaramaıtyn sertıfıkatty berýdiń ne qajeti bar edi deıdi kópbalaly ana.
"Eki mıllıonnyń ústine shamaly aqsha qosyp úı alamyn dep oıladym. Bergen kezde qýandym, ótirik aıtpaıyn. Kórshilerim qutty bolsyn aıtyp keldi. Eki mıllıon alypsyń dedi. Bul qur qaǵaz bolyp shyqty. Maǵan bul aqsha berilgen joq", - deıdi kópbalaly ana Aısulý Kúzdibaeva.
Jataqhananyń aıadaı bólmesinde bes balasymen turatyn Aısulý jyl basynda áleýmettik jeli arqyly elden kómek suraǵan. Sol kezde eriktiler kerek-jaraǵyn alyp berip, bólmesine jóndeý júrgizipti. Al ákimdik tarapynan eshqandaı qoldaý bolmaǵan.
"Ol otbasynyń turmystyq jaǵdaıy qıyn eken. Jastar bolyp ózimiz jóndeý jumysyna aqsha jınadyq. Edeninen bastap, tóbesi men qabyrǵasyna deıin jańalap berdik. Qosymsha kerekti jıhaz ben teledıdar alyp berdik", - deıdi erikti Shahretdın Azımov.
Oqı otyryńyz: Danıal Ahmetov shkaftyń esigin ashyp jatqan kezde kútpegen jaǵdaı boldy – vıdeo
Eriktilerdiń eńbegin enshilep, jomart jandar jınap bergen qarjyny sertıfıkatqa 2 mıllıon dep jazyp bergenderin sheneýnikter de moıyndaıdy. Biraq kók tıyn quny joq bir japyraq qaǵazdy kópbalaly anaǵa saltanatty túrde tapsyrýǵa ne túrtki bolǵanyn túsindirip bere almaı otyr.
"Osy ıgi isti basqalarǵa úlgi etý maqsatynda jastardyń atynan sertıfıkat tapsyryp, olarǵa alǵysymyzdy bildirgimiz keldi. Onda Aısulý hanymǵa jumsalǵan qarjyny kórsettik", - deıdi Aqtóbe oblysy QHA hatshylyǵynyń meńgerýshisi Marjan Qorǵanbaeva.
Bes balanyń anasy Aısulý Kúzdibaevanyń atynda baspana joq. Turyp jatqan jataqhanadaǵy bólmesin týystary bergen. Joldasy qystaýǵa qatynap qoı baǵady. Al ákimdiktegiler osy daýdan soń qandaı da bir kómek berý týraly jaq ashpaı otyr. Eń bolmaǵanda keshirim surap baratynyn da aıtpady.
