جەكسەنبى، 21 ناۋرىز كۇنى ەلوردادا لوكداۋن ەنگىزىلەدى، دەپ حابارلادى اكىمدىكتىڭ ءباسپاسوز قىزمەتى.
مۇنداي شەشىمگە نۇر-سۇلتان قالاسىنىڭ كوروناۆيرۋس تارالۋى بويىنشا "قىزىل ايماققا" ەنۋى سەبەپ بولعان.
"جەكسەنبىدە ساۋدا ويىن-ساۋىق ورتالىقتارى، ساۋدا ۇيلەرى، ساۋدا ورتالىقتارى(ولاردا ورنالاسقان ءدارىحانالاردى، سونداي-اق تاماق ونىمدەرى مەن ءبىرىنشى كەزەكتە قاجەتتى زاتتاردى ساتاتىن جانە ورنالاسقان جەرىنە قاراماستان قىزمەتىنە رۇقسات ەتىلگەن وبەكتىلەردى قوسپاعاندا), جابىق ازىق-تۇلىك ەمەس بازارلار، ازىق-تۇلىك ەمەس تاۋار ساتاتىن نىساندار، جابىق سپورت وبەكتىلەرى، حقو، "قازپوشتا" اق سەكىلدى مەكەمەلەردىڭ جۇمىس ىستەۋىنە تىيىم سالىنادى", - دەلىنگەن اقپاراتتا.
سونداي-اق، دەزينفەكتسيالىق جۇمىستار جۇرگىزىلۋىنە بايلانىستى جەكسەنبى كۇنى قوعامدىق كولىكتىڭ جۇمىسى توقتاتىلادى.
سەنبى جانە جەكسەنبى كۇندەرى فيتنەس-ورتالىقتاردىڭ، فيتنەس-كلۋبتاردىڭ، سپورتتىق-ساۋىقتىرۋ وبەكتىلەرىنىڭ، ساۋنالاردىڭ، سپا-ورتالىقتاردىڭ ("سارى ايماق" تالابى قولدانىلاتىن "Ashyq" پيلوتتىق جوباسىنا قاتىساتىن وبەكتىلەردى قوسپاعاندا) جۇمىسىنا تىيىم سالىنادى.
"قالاداعى ەپيدەميولوگيالىق جاعداي تۇراقسىز. وتكەن مەرەكە كۇندەرىنەن كەيىن كوروناۆيرۋس ينفەكتسياسىن جۇقتىرۋشىلار سانى كۇرت كوبەيدى. وسىعان بايلانىستى قوسىمشا كارانتيندىك شەكتەۋلەرى بار قاۋلى 18 ناۋرىزدان باستاپ قولدانىسقا ەنگىزىلەدى", - دەدى نۇر-سۇلتان قالاسىنىڭ باس مەملەكەتتىك سانيتارلىق دارىگەرى سارحات بەيسەنوۆا.
ونىڭ ايتۋىنشا، ىندەتتىڭ ورشۋىنە جول بەرمەۋ كەرەك. سوندىقتان ناۋرىز مەيرامىنا وراي بۇقارالىق ءىس-شارالار وتكىزۋگە تىيىم سالىنادى.
"مەديتسينالىق ۇيىمدار مەن مەديتسينا قىزمەتكەرلەرىنە شامادان تىس جۇكتەمە بولماس ءۇشىن قاتاڭ سانيتارلىق نورمالار ساقتالۋى قاجەت، ياعني بەتپەردە تاعىپ، الەۋمەتتىك قاشىقتىقتى ساقتاۋ كەرەك", - دەدى ول.
18 ناۋرىزدان باستاپ قوعامدىق تاماقتانۋ نىساندارىنىڭ (مەيرامحانالار، ءدامحانالار، بارلار، اسحانالار) جۇمىس ۋاقىتى ساعات 07:00-دەن 22:00-گە دەيىن قىسقارادى.
سونداي-اق 18 ناۋرىزدان باستاپ كينوتەاترلار مەن كينورۋمداردىڭ جۇمىسىنا تىيىم سالىنادى.
