قازاقستاندىقتاردىڭ باسىم بولىگى نەگە رەسەي ۋنيۆەرسيتەتتەرىندە وقۋعا مۇددەلى؟

2197
رەسەي فەدەراتسياسىنىڭ عىلىم جانە ءبىلىم مينيسترلىگىنىڭ اقپاراتتىق دەرەكتەرى بويىنشا قازاقستاندىقتاردىڭ باسىم بولىگى ءوز ۇل-قىزدارىن رەسەيدىڭ ۋنيۆەرستيەتتەرىندە وقىتادى ەكەن. جالپى رەسەيلىك وقى ورىندارىنداعى ستاتيستيكا الەم بويىنشا شەتەلدىكتەردەن رەسەي ۋنيۆەرسيتەتتەرىندە ەڭ كوپ وقيتىن دا قازاقستاندىقتار دەپ كورسەتىپ وتىر. ونىڭ ىشىندە "بولاشاق" باعدارلاماسى بويىنشا رەسەيدىڭ ۋنيۆەرسيتەتتەرىندە وقيتىندار دا كوش الدىندا كەلەدى.
 
رەسەي تاراپىنان ءبىزدىڭ ەلگە كەرى اسەر ەتەتىن ەڭ ءبىرىنشى فاكتور - بۇل ءتىل. رەسەيدە وقىپ كەلگەندەردىڭ قازىرگى مەملەكەتتىك قىزمەتتە وتىرعاندارىنىڭ كوپشىلىگى قازاق تىلىنەن ماقرۇم، ءتىپتى بىلمەيدى دە، قازاق ءتىلىن قاجەت دەپ تە تاپپايدى. بۇل وزدەرىنىڭ ۇل-قىزدارىنىڭ بولاشاعىن ءابسوليۋتتى تۇردە قازاقستانمەن بايلانىستىرمايدى دەپ تە ايتۋعا بولادى.
 
ەكىنشىدەن، بىزدەگى اقپاراتتىق كەڭىستىك ءالى دە ورىس ءتىلىنىڭ ىقپالىندا قالىپ وتىر. كىتاپحانالارداعى 90 پايىز وقۋلىق ورىسشا، الەۋمەتتىك جەلىدە دە ورىس ءتىلى اۋديتورياسى باسىمدىققا يە. ەلدەگى ەڭ ماڭىزدى سەكتورلاردىڭ بارلىعى دا ورىس ءتىلىنىڭ جەتەگىندە. ءوزىمىز دە بىرنەشە كومپانيالارمەن سەرىكتەس بولىپ جۇمىس جاسايمىز، بىراق بارلىق جيىن دەرلىك ورىس تىلىندە وتەدى. قۇجاتتاردىڭ بارلىعى دا ورىس تىلىندە. بىراق، جينالىستاردا وتىرعانداردىڭ بارلىعى دا قازاقتار. نەگە؟
قازاق ءتىلى ەڭ ماڭىزدى ىسكەرلىك سەكتورلاردا كەڭىنەن قولدانىس تاپپاسا، سىرتتا وتىرىپ الىپ، جالعان ۇلتشىل بولۋىڭ ەشتەڭەنى دە شەشپەيدى. شەشسە وسى ۋاقىتقا دەيىن شەشىلەر ەدى عوي. سول تاسادا قالعانى سول، قالىپ كەتە بەرەدى. ءتىل مەملەكەتتىڭ باستى يدەولوگيالىق ۇستىنىنا اينالۋى ءۇشىن ول ەڭ ماڭىزدى سەكتورلاردا قىزمەت ەتۋى كەرەك. قازاق ءتىلى عىلىم سالاسىندا، ءبىلىم سالاسىندا، مەملەكەتتىك باسقارۋ سالاسىنداعى، جەكەلەنگەن كاسىپورىندار مەن كومپانيالاردا، ۇلتتىق كومپانيالاردا قىزمەت ەتۋى كەرەك.
ۇلتتىڭ ءتىلى عىلىم مەن ءبىلىم سالاسىندا وزىق تۇردە قولدانىلماي، ۇلتتىق دامۋ ەشقاشان دا بولمايدى. ونى ءبىز ءوزىمىز قىزمەت ەتكىزۋىمىز كەرەك. ەگەر ءتىل بۇلاي قىزمەت ەتپەسە، ىقپالىن كورسەتپەسە، وندا بۇل بوداندىق قانا. باسقا ەشتەڭە ەمەس.
 
مەملەكەتتىك ءتىلدىڭ تاعدىرى مەن بولاشاعى ءبىر سەكۋند بولسا دا قاپەردەن شىقپاۋعا ءتيىس ءارى ونى ەڭ ماڭىزدى ورىنداردا قولدانىسقا ەنگىزۋگە مىندەتتىمىز. ەگەر دە ءبىز ءدال قازىرگى ۇردىسپەن قازاق ءتىلىنىڭ ىقپالىنان ايىرىلعانىنا جول بەرە بەرسەك، رەسمي عانا ەل بولىپ، پراكتيكادا وتارعا اينالامىز. ۇلتتىق باعىتتاعى دامۋدى ءوزىمىز شەكتەپ تاستايمىز. مەن ەلوردادا قىز-كەلىنشەكتەردىڭ بۇلدىرشىندەرگە تەك قانا ورىسشا سويلەيتىنىن ۇنەمى كەزدەستىرەمىن ءارى بۇلدىرشىندەردىڭ بىرتەگىس ورىسشا سويلەپ كەلە جاتقانى قاتتى الاڭداتادى.
 
بەكبولات قارجان،
"ادىرنا" ۇلتتىق پورتالى 
پىكىرلەر
رەداكتسيا تاڭداۋى